ന്യൂഡല്ഹി: സ്വര്ണക്കടത്തുമായി ബന്ധപ്പെട്ട കള്ളപ്പണം വെളുപ്പിക്കലില് കേസില് നിര്ണായക നീക്കവുമായി ഇ ഡി. കേരളത്തിന് പുറത്തുള്ള കോടതിയിലേക്ക് കേസിന്റെ വിചാരണ മാറ്റാനാണ് അപേക്ഷ നല്കിയത്. ഇഡി കൊച്ചി സോണ് അസിസ്റ്റന്റ് ഡയറക്ടറാണ് ആവശ്യവുമായി സുപ്രീം കോടതിയെ സമീപിച്ചത്. കേരളത്തില് കേസിന്റെ വിചാരണ നടന്നാല് സാക്ഷികളെ സ്വാധീനിച്ച് അട്ടിമറിയുണ്ടാകുമെന്ന ആശങ്കയാണ് ഇഡിയെ പുതിയ നീക്കത്തിന് പ്രേരിപ്പിച്ചത്. രാജ്യതലസ്ഥാനത്ത് ഇത് സംബന്ധിച്ച് നടന്ന ഉന്നത ഉദ്യോഗസ്ഥന്മാരുടെ മീറ്റിംഗിന് ശേഷമാണ് സുപ്രീം കോടതിയില് അപേക്ഷ നല്കാന് തീരുമാനമായത്.
അടുത്തിടെ സ്വപ്നയുടെ അപ്രതീക്ഷിത വെളിപ്പെടുത്തലിന് പിന്നാലെയാണ് സ്വര്ണക്കടത്ത്, ഡോളര് കടത്ത് കേസുകളില് പുതിയ വേഗം കൈവന്നത്. ഇതിന് പിന്നാലെ സംസ്ഥാന സര്ക്കാര് സ്വപ്നയ്ക്കെതിരെയുള്ള കേസുകളിലും അന്വേഷണ വേഗം കൂട്ടിയിരുന്നു. എറണാകുളം ജില്ലാ സെഷന്സ് കോടതിയുടെ പരിഗണനയിലുള്ള കേസാണ് ബംഗളൂരുവിലേക്ക് മാറ്റാന് ഇ ഡി ഇതിനിടെ ശ്രമിക്കുന്നത്. സ്വപ്ന സുരേഷ്, സന്ദീപ് നായര്, ശിവശങ്കര്, സരിത്ത് തുടങ്ങി നാല് പ്രതികളാണ് ഈ കേസിലുള്ളത്.
Discussion about this post