ന്യൂഡല്ഹി:ചരിത്രം കുറിച്ചുകൊണ്ട് സന്താള് ആദിവാസി വിഭാഗത്തില് നിന്നുള്ള ദ്രൗപദി മുര്മു ( 64) ഇന്ത്യയുടെ 15-ാം രാഷ്ട്രപതിയായി തിരഞ്ഞെടുക്കപ്പെട്ടു. ഒഡിഷയിലെ മയൂര്ഭഞ്ജ് ജില്ലയിലെ പിന്നാക്ക മേഖലയായ രയിരംഗ്പൂര് ഗ്രാമത്തില് നിന്നാണ് മുര്മു രാഷ്ട്രപതി ഭവനില് എത്തുന്നത്. പരമോന്നത പദവിയില് എത്തുന്ന ആദ്യ ആദിവാസി വനിതയാണ്. ജൂലായ് 25നാണ് സത്യപ്രതിജ്ഞ. രാഷ്ട്രപതി രാംനാഥ് കോവിന്ദിന്റെ കാലാവധി ജൂലായ് 24ന് പൂര്ത്തിയാകും.
മൊത്തം 2,824 വോട്ട് ( മൂല്യം 6,76,803 ) നേടിയാണ് മുര്മുവിന്റെ വിജയം. ഏറെ പിന്നിലായ സംയുക്ത പ്രതിപക്ഷ സ്ഥാനാര്ത്ഥി യശ്വന്ത് സിന്ഹയ്ക്ക് 1877 ( മൂല്യം 3,80,177) വോട്ടാണ് കിട്ടിയത്. ജയിക്കാന് 5,28,491 മൂല്യ വോട്ടാണ് വേണ്ടിയിരുന്നത്.
പാര്ലമെന്റില് രാവിലെ 11 ന് തുടങ്ങിയ വോട്ടെണ്ണലില് ആദ്യ റൗണ്ടില് തന്നെ മുര്മു ലീഡ് നേടി. മൂന്നാം റൗണ്ടില് കേരളം അടക്കം 20 സംസ്ഥാനങ്ങളിലെ ബാലറ്റ് എണ്ണിക്കഴിഞ്ഞപ്പോള് 50 ശതമാനത്തിലേറെ വോട്ടു നേടി വിജയം ഉറപ്പിച്ചു. പിന്നാലെ പ്രധാനമന്ത്രി നരേന്ദ്രമോദി ഡല്ഹിയിലെ വസതിയിലെത്തി മുര്മുവിനെ അഭിനന്ദിച്ചു.
ബി.ജെ.പി ഉച്ച മുതല് രാജ്യത്താകെ ആഘോഷം തുടങ്ങിയിരുന്നു. ഡല്ഹിയിലെ പാര്ട്ടി ആസ്ഥാനത്തു നിന്ന് കേന്ദ്രമന്ത്രിമാരുള്പ്പെടെ അണിനിരന്ന ‘അഭിനന്ദന് യാത്ര’ നടത്തി. മുര്മുവിന്റെ സംസ്ഥാനമായ ഒഡീഷയും സ്വദേശമായ മയൂര്ഭഞ്ജും ആഹ്ളാദത്തിമിര്പ്പിലാണ്. ആദിവാസി ഗോത്ര വിഭാഗക്കാര് പരമ്പരാഗത നൃത്തം ചവിട്ടി.
ആദിവാസി വനിതയെ സ്ഥാനാര്ത്ഥിയാക്കിയ ബി.ജെ.പി തന്ത്രം അക്ഷരാര്ത്ഥത്തില് വിജയമായി. പലയിടത്തും കോണ്ഗ്രസ്, സമാജ്വാദി, എന്.സി.പി എം.എല്.എമാര് മുര്മുവിന് വോട്ടു ചെയ്തു. പശ്ചിമ ബംഗാളിലെ 17 തൃണമൂല് എം.എല്.എമാര് അടക്കം നൂറോളം വോട്ട് അധികം ലഭിച്ചെന്നാണ് ബി.ജെ.പി അവകാശവാദം.
മൊത്തം പോള് ചെയ്ത വോട്ട് 4754
സാധുവായത് 4701
അസാധു 53
ദ്രൗപതി മുര്മു 2824
യശ്വന്ത് സിന്ഹ 1877
Discussion about this post