ന്യൂഡല്‍ഹി: 1971ലെ ഇന്ത്യാ-പാക് യുദ്ധത്തില്‍ രാജ്യത്തിന് വേണ്ടി പോരാടിയ വീര സൈനികരുടേയും സ്വാതന്ത്ര്യ സമര സേനാനികളുടേയും ത്യാഗങ്ങള്‍ക്കുള്ള ആദരാഞ്ജലിയാണ് വിക്രാന്തിനെ പുനരുജ്ജീവനമെന്ന് നാവികസേന. രാജ്യത്തെ ആദ്യ തദ്ദേശീയ വിമാനവാഹിനക്കപ്പലാണ് ഐഎന്‍എസ് വിക്രാന്ത്. കൊച്ചി കപ്പല്‍ശാലയില്‍ നിര്‍മ്മിച്ച വിക്രാന്ത് സെപ്തംബര്‍ രണ്ടിന് കമ്മീഷന്‍ ചെയ്യും. ഈ ചടങ്ങില്‍ പ്രധാനമന്ത്രി നരേന്ദ്രമോദി മുഖ്യാതിഥിയാകും.
45,000 ടണ്‍ ഭാരമുള്ള യുദ്ധക്കപ്പലാണ് ഐഎന്‍എസ് വിക്രാന്ത്. വിക്രാന്തിന്റെ പുനര്‍ജന്മം സേനയുടെ പ്രതിരോധ സംവിധാനത്തിന് കൂടുതല്‍ കരുത്ത് പകരുമെന്നും നാവികസേന വ്യക്തമാക്കി. ഇന്ത്യന്‍ നാവികസേനയുടെ ഇന്‍-ഹൗസ് ഓര്‍ഗനൈസേഷനായ വാര്‍ഷിപ്പ് ഡിസൈന്‍ ബ്യൂറോയാണ് വിക്രാന്ത് രൂപകല്‍പന ചെയ്തത്. 262 മീറ്റര്‍ നീളവും 62 മീറ്റര്‍ വിസ്താരവും വിക്രാന്തിനുണ്ട്. രണ്ട് ഫുട്ബോള്‍ മൈതാനങ്ങളുടെ വലിപ്പമാണ് ഇതിനുള്ളത്. തദ്ദേശീയമായി നിര്‍മ്മിച്ച അഡ്വാന്‍സ്ഡ് ലൈറ്റ് ഹെലികോപ്റ്ററുകള്‍ (എഎല്‍എച്ച്), ലൈറ്റ് കോംബാറ്റ് എയര്‍ക്രാഫ്റ്റുകള്‍ എന്നിവയ്ക്ക് പുറമെ മിഗ്-29കെ യുദ്ധവിമാനങ്ങള്‍, കമോവ്-31, എംഎച്ച്-60ആര്‍ മള്‍ട്ടി റോള്‍ ഹെലികോപ്റ്ററുകള്‍ തുടങ്ങീ മുപ്പതോളം വിമാനങ്ങളെ വഹിക്കാനുള്ള ശേഷി ഇതിനുണ്ട്. വിമാനത്തിന്റെ സുരക്ഷ ഉള്‍പ്പെടെ കപ്പലിന്റെ പൂര്‍ണമായ നിയന്ത്രണം നാവികസേനയ്ക്കാണ്.
28 നോട്ടിക്കല്‍ മൈല്‍ വേഗതയില്‍ സഞ്ചരിക്കാന്‍ വിക്രാന്തിനാകും. 2300ലധികം കംപാര്‍ട്മെന്റുകള്‍ ഉള്ള വിക്രാന്തിന് 1700ലധികം ആളുകളെ വഹിക്കാനാകും. വനിതാ ഉദ്യോഗസ്ഥര്‍ക്കായി പ്രത്യേക ക്യാബിനുകളും ഇതിലുണ്ട്. അത്യാധുനിക മെഡിക്കല്‍ സൗകര്യങ്ങളുള്ള മെഡിക്കല്‍ കോംപ്ലക്‌സാണ് കപ്പലിലുള്ളത്. ഐസൊലേഷന്‍ വാര്‍ഡും ടെലിമെഡിസിന്‍ സൗകര്യങ്ങളും ഇതില്‍ ലഭ്യമാകും. മുങ്ങിക്കപ്പലുകളെ തിരിച്ചറിഞ്ഞ് അതിന് അനുസൃതമായി അതിവേഗം ഗതിമാറ്റാനും വിക്രാന്തിന് സാധിത്തും. കപ്പലിലെ സെന്‍സറുകള്‍, റഡാറുകള്‍, ദിശാ നിര്‍ണയ ഉപകരണങ്ങള്‍ എന്നിവയിലൊക്കെ അത്യാധുനിക സാങ്കേതിക വിദ്യകള്‍ ഉപയോഗിച്ചിരിക്കുന്നു.
Discussion about this post