ന്യൂഡല്ഹി: വിവാദമായ ആസാദ് കാശ്മീര് പരാമര്ശത്തില് കെ ടി ജലീലിനെതിരെ കേസെടുക്കാന് കോടതി ഉത്തരവ്. സംഭവവുമായി ബന്ധപ്പെട്ട് പൊലീസ് നല്കിയ റിപ്പോര്ട്ട് പരിശോധിച്ചതിന്റെ അടിസ്ഥാനത്തിലാണ് ജലീലിനെതിരെ കേസെടുക്കാന് ദില്ലി റോസ് അവന്യു കോടതി ഉത്തരവിട്ടത്. പ്രസക്തമായ വകുപ്പുകള് ചുമത്തി കേസെടുക്കണമെന്നാണ് കോടതി ഉത്തരവില് വ്യക്തമാക്കിയിരിക്കുന്നത്. വിധി പറയുന്നതിലേക്ക് കോടതി രണ്ടു ദിവസത്തേക്ക് കേസ് മാറ്റിയിരിക്കുകയാണ്.
ജലീലിനെതിരെ ദേശദ്രോഹ കുറ്റം ചുമത്തി കേസെടുക്കണമെന്നാണ് പരാതിക്കാരനായ ജി എസ് മണിയുടെ ആവശ്യം. ജലീലിനെതിരെ കേരള പൊലീസ് എടുത്ത കേസില് തനിക്ക് വിശ്വാസമില്ലെന്നും, ഭരണകക്ഷി എംഎല്എ ആയതിനാല് കേസ് കേരളത്തില് അട്ടിമറിക്കപ്പെടാന് സാദ്ധ്യതയുണ്ടെന്നും അദ്ദേഹം ആരോപിച്ചു.
പാക് അധിനിവേശ കാശ്മീരിനെ ‘ആസാദ് കാശ്മീര്’ എന്നും ഇന്ത്യയുടെ കാശ്മീരിനെ ‘ഇന്ത്യന് അധീന കാശ്മീര്’ എന്നും വിശേഷിപ്പിച്ചതോടെയാണ് മുന് മന്ത്രിയും സി.പി.എം സഹചാരിയുമായ കെ.ടി.ജലീലില് പുലിവാല് പിടിച്ചത്. ജലീലിനെതിരെ രാജ്യദ്രോഹം ആരോപിച്ച് ബി. ജെ. പി നേതാക്കള് വിവാദം ഏറ്റുപിടിച്ചു.
മുന്മന്ത്രി എ.സി.മൊയ്തീന് ഉള്പ്പെട്ട സംഘത്തിനൊപ്പം കാശ്മീര് സന്ദര്ശനം നടത്തുന്നതിനിടെയായിരുന്നു വിവാദ ഫേസ്ബുക്ക് കുറിപ്പ്. പരാമര്ശം വിവാദമായതോടെ ഫേസ്ബുക്ക് കുറിപ്പ് ജലീല് പിന്വലിക്കുകയും ചെയ്തു.
Discussion about this post