തിരുവനന്തപുരം: കസ്റ്റഡിയിലെടുത്തവരെ വിട്ടുകിട്ടണമെന്നാവശ്യപ്പെട്ട് വിഴിഞ്ഞം പോലീസ് സ്റ്റേഷന് മുന്നില്‍ സംഘര്‍ഷം. പ്രതിഷേധക്കാര്‍ രണ്ട് പോലീസ് ജീപ്പുകള്‍ മറിച്ചിട്ടു. പോലീസ് സ്റ്റേഷനു മുന്നില്‍ സമരസമിതി പ്രവര്‍ത്തകര്‍ തടിച്ചുകൂടി. സ്ഥലത്ത് സംഘര്‍ഷാവസ്ഥ നിലനില്‍ക്കുകയാണ്. പോലീസ് കസ്റ്റഡിയിലെടുത്ത അഞ്ചുപേരെ വിട്ടയക്കണമെന്നാണ് ആവശ്യം.
വിവിധ സ്ഥലങ്ങളില്‍നിന്ന് നൂറുകണക്കിന് ആളുകളാണ് പ്രതിഷേധവുമായി പോലീസ് സ്റ്റേഷനു മുന്നില്‍ തടിച്ചുകൂടിയിരിക്കുന്നത്. സമരക്കാരെ നേരിടാന്‍ പോലീസും കൂടുതല്‍ സന്നാഹങ്ങള്‍ ഒരുക്കിയിട്ടുണ്ട്.
സമീപ സ്റ്റേഷനുകളില്‍നിന്ന് പോലീസുകാരെ വിഴിഞ്ഞത്തേക്ക് എത്തിച്ചിട്ടുണ്ട്. റാപ്പിഡ് ആക്ഷന്‍ ഫോഴ്‌സും സ്ഥലത്ത് എത്തിയിട്ടുണ്ട്. ഡിസിപിയുടെ നേതൃത്വത്തിലാണ് പോലീസിനെ വിന്യസിച്ചിരിക്കുന്നത്. കസ്റ്റഡിയിലെടുത്തവരെ വിട്ടയക്കാതെ പിരിഞ്ഞുപോകില്ലെന്നാണ് സമരക്കാരുടെ നിലപാട്. പോലീസ് ഇതിന് വഴങ്ങിയിട്ടില്ല.
മത്സ്യത്തൊഴിലാളികളുടെ അതിജീവന സമര പന്തല്‍ പൊളിക്കാനുള്ള ശ്രമം തടഞ്ഞതുമായി ബന്ധപ്പെട്ടുണ്ടായ സംഘര്‍ഷത്തിന്റെ പേരില്‍ സ്ഥലത്ത് ഇല്ലാതിരുന്ന തിരുവനന്തപുരം ലത്തീന്‍ അതിരൂപത ആര്‍ച്ച് ബിഷപ്പ് ഡോ. തോമസ് ജെ. നെറ്റോ, സഹായ മെത്രാന്‍ ഡോ. ക്രിസ്തുദാസ് അടക്കമുള്ളവര്‍ക്കെതിരേ പോലീസ് കേസെടുത്തിരുന്നു.
കുറ്റകരമായ ഗൂഢാലോചനയും ആസൂത്രിത അക്രമമുണ്ടാക്കാനുള്ള ശ്രമവും അടക്കമുള്ള വകുപ്പുകള്‍ ചുമത്തിയാണ് സംസ്ഥാനത്തിന്റെ ച രിത്രത്തില്‍ കേട്ടുകേള്‍വിയില്ലാത്ത വിധത്തില്‍ സംഘര്‍ഷ സ്ഥലത്തു പോലും ഇല്ലാതിരുന്ന ആര്‍ച്ച് ബിഷപ്പ് അടക്കമുള്ളവര്‍ക്കെതിരേ കേസെടുത്തത്.
വികാരി ജനറല്‍ മോണ്‍. യൂജിന്‍ എച്ച്. പെരേര ഉള്‍പ്പെടെയുള്ള പത്തിലേറെ വൈദികര്‍ അടക്കം 96 പേരെ പ്രതിപ്പട്ടികയില്‍ ഉള്‍പ്പെടുത്തി. കണ്ടാലറിയാവുന്ന ആയിരത്തോളം പേരെയും പ്രതിപ്പട്ടികയില്‍ ഉള്‍പ്പെടുത്തി. സംഘര്‍ഷവുമായി ബന്ധപ്പെട്ട് ഒന്‍പത് കേസുകളാണു വിഴിഞ്ഞം പോലീസ് രജിസ്റ്റര്‍ ചെയ്തത്. സംഘര്‍ഷവുമായി ബന്ധപ്പെട്ടു മത്സ്യത്തൊഴിലാളിയായ വിഴിഞ്ഞം സ്വദേശി ഷെല്‍ട്ടണെ പോലീസ് അറസ്റ്റ് ചെയ്തു. സംഭവവുമായി ബന്ധപ്പെട്ട ആദ്യ അറസ്റ്റാണിത്.
ശനിയാഴ്ചയുണ്ടായ സംഘര്‍ഷാവസ്ഥ സൃഷ്ടിക്കാന്‍ സര്‍ക്കാര്‍ ആസൂത്രിത നീക്കം നടത്തിയെന്നും ഇതാണു സംഘര്‍ഷത്തിലേക്കു നീങ്ങിയതെന്നുമുള്ള ഗുരുതരമായ ആരോപണമാണ് ലത്തീന്‍ അതിരൂപത ഉന്നയിക്കുന്നത്.
വിഴിഞ്ഞം തുറമുഖ നിര്‍മാണവുമായി ബന്ധപ്പെട്ടു തീരശോഷണം നേരിട്ടു വീടും ജീവനോപാധിയും നഷ്ടമായ മത്സ്യത്തൊഴിലാളി സമൂഹത്തിന്റെ അതിജീവനത്തിനു വേണ്ടി നടത്തുന്ന സമരത്തിന്റെ പന്തല്‍ പൊളിക്കാനുള്ള ശ്രമത്തിനിടയിലാണ് വിഴിഞ്ഞം മുല്ലൂരില്‍ ശനിയാഴ്ച സംഘര്‍ഷമുണ്ടായത്. വിഴിഞ്ഞം തുറമുഖ നിര്‍മാണത്തിനായി അദാനി ഗ്രൂപ്പിന്റെ നിര്‍മാണ സാമഗ്രികള്‍ എത്തിക്കാനുള്ള ശ്രമത്തിനിടയിലാണു സമരപന്തല്‍ പൊളിക്കാന്‍ ശ്രമിച്ചതും സംഘര്‍ഷമുണ്ടായതും.
Discussion about this post