ദില്ലി: ആയിരങ്ങളെ സാക്ഷിയാക്കി ഹിമാചല് പ്രദേശിന്റെ പതിനഞ്ചാമത് മുഖ്യമന്ത്രിയായി സുഖ്വീന്ദര് സിംഗ് സുഖു സത്യപ്രതിജ്ഞ ചെയ്ത് അധികാരത്തിലേറി. കോണ്ഗ്രസ് അധ്യക്ഷന് മല്ലികാര്ജുന ഖര്ഗെയുടെ സാന്നിധ്യത്തില് ഷിംലയില് നടന്ന ചടങ്ങുകളില് രാഹുല് ഗാന്ധിക്കും പ്രിയങ്കാ ഗാന്ധിക്കും ഒപ്പം സച്ചിന് പൈലറ്റ്, അശോക് ഗെഹ്ലോട്ട്, കെസി വേണുഗോപാല് അടക്കമുള്ള നേതാക്കളും പങ്കെടുത്തു. മുഖ്യമന്ത്രിക്ക് പിന്നാലെ മുകേഷ് അഗ്നിഹോത്രി ഉപമുഖ്യമന്ത്രിയായും സത്യപ്രതിജ്ഞ ചെയ്തു.
പിസിസി പ്രസിഡന്റ് പ്രതിഭാ സിംഗിനെ വസതിയിലെത്തി കണ്ടതിന് ശേഷമാണ് സുഖ്വീന്ദര് സിംഗ് അധികാരമേറ്റെടുത്തത്. മകന് വിക്രമാദിത്യ സിംഗ് മിക്കവാറും മന്ത്രിസഭയില് ഉണ്ടാകുമെന്ന് പ്രതിഭാ സിംഗ് പറഞ്ഞു. ഹൈക്കമാന്ഡ് തീരുമാനം ബഹുമാനിക്കുന്നതായി വിക്രമാദിത്യ സിംഗും വ്യക്തമാക്കി.
കഴിഞ്ഞ നാല് പതിറ്റാണ്ടില് ഹിമാചല് പ്രദേശ് കോണ്ഗ്രസിനെ എല്ലാ തലങ്ങളിലും നയിച്ച് കഴിവുതെളിയിച്ചാണ് സുഖ് വീന്ദര് സിംഗ് സുഖു മുഖ്യമന്ത്രിസ്ഥാനത്തേക്കെത്തുന്നത്. സംസ്ഥാന കോണ്ഗ്രസിലെ അതികായനായിരുന്ന വീരഭദ്ര സിങ്ങിനോട് കലഹിച്ചു നിന്നായിരുന്നു സുഖുവിന്റെ രാഷ്ട്രീയത്തിലെ വളര്ച്ച.
എന്എസ്യുവിനെയും യൂത്ത് കോണ്ഗ്രസിനെയും പതിനാറ് കൊല്ലം സംസ്ഥാനത്ത് സുഖു നയിച്ചു. 4 വര്ഷം സംസ്ഥാന ജനറല് സെക്രട്ടറി. 6 വര്ഷം പിസിസി അധ്യക്ഷനായി. രാഹുല് ഗാന്ധിയുമായും അടുത്ത ബന്ധം. എന്നാല് ഒന്നിടവിട്ട തെരഞ്ഞെടുപ്പില് കോണ്ഗ്രസ് അധികാരത്തിലെത്തുന്ന സംസ്ഥാനത്ത് നാലുപതിറ്റാണ്ടോളം നീണ്ട രാഷ്ട്രീയ ജിവിതത്തില് ഇതുവരെ സുഖു മന്ത്രിയായിട്ടില്ല. 1992 ല് ഷിംല കോര്പ്പറേഷന് കൗണ്സിലറായി. 2003 മുതല് നാല് തവണ എംഎല്എയായിരുന്നു. 2007 മുതല് 5 വര്ഷം നിയമസഭയില് ചീഫ് വിപ്പും ആയി പ്രവര്ത്തിച്ചിട്ടുണ്ട്.
Discussion about this post