ലക്നൗ: 2024 ജനുവരി ഒന്നിനകം അയോദ്ധ്യയിലെ രാമക്ഷേത്രം ഭക്തജനങ്ങള്ക്കായി തുറന്നുകൊടുക്കുമെന്ന കേന്ദ്ര ആഭ്യന്തരമന്ത്രി അമിത് ഷായുടെ പ്രഖ്യാപനത്തിന് പിന്നാലെ, നിര്മാണ പ്രവര്ത്തനങ്ങള് വേഗത്തിലാക്കി ശ്രീരാമ ജന്മഭൂമി തീര്ത്ഥ ക്ഷേത്രം ട്രസ്റ്റ്. വരുന്ന ഒക്ടോബറോടെ ശ്രീകോവില് പൂര്ത്തിയാക്കി ഭക്തര്ക്കായി തുറന്നുകൊടുക്കുക എന്ന ലക്ഷ്യത്തോടെയാണ് ഇപ്പോള് പണി പുരോഗമിക്കുന്നത്.
ഡിസംബര് 21 നും 2024 ജനുവരി 14 നും ഇടയില് ക്ഷേത്രത്തില് വിഗ്രഹ പ്രതിഷ്ഠ ചടങ്ങ് നടക്കും. നിലത്തിന്റെ പണികളാണ് ഇപ്പോള് നടന്നുകൊണ്ടിരിക്കുന്നത്. കൃത്യസമയത്ത് നിര്മാണം പൂര്ത്തിയാക്കാനായി രണ്ട് ഷിഫ്റ്റുകളിലായി പ്രതിദിനം 550 തൊഴിലാളികളാണ് ഇവിടെ ജോലി ചെയ്യുന്നത്. നിര്മാണ പ്രവര്ത്തനങ്ങള് നടക്കുന്ന സ്ഥലത്ത് അതീവ സുരക്ഷയാണ് ഏര്പ്പെടുത്തിയിരിക്കുന്നത്.
നിര്മാണ പ്രവര്ത്തനങ്ങളിലെ പുരോഗതി തൃപ്തികരമാണെന്ന് ശ്രീരാമ ജന്മഭൂമി ട്രസ്റ്റ് ജനറല് സെക്രട്ടറി ചമ്പത് റായ് പറഞ്ഞു. ‘നിശ്ചയിച്ച സമയത്തിനുള്ളില് പണി പൂര്ത്തിയാക്കാനാകുമെന്ന ആത്മ വിശ്വാസത്തിലാണ് സൂപ്പര്വൈസര്മാരും എഞ്ചിനീയര്മാരുമെല്ലാം.
ഈ വര്ഷം ഒക്ടോബറോടെ താഴത്തെ നിലയുടെ പണി പൂര്ത്തിയാകും. ഓരോ നിരയിലും ദൈവങ്ങളുടെ 16 വിഗ്രഹങ്ങള് കൊത്തിവെക്കും. മുഹൂര്ത്തം അനുസരിച്ച് ഡിസംബര് 21 നും മകരസംക്രാന്തിക്കും ഇടയില് വിഗ്രഹപ്രതിഷ്ഠാ ചടങ്ങ് നടത്തും. ഈ ചടങ്ങിന് ശേഷം ക്ഷേത്രം ഭക്ത ജനങ്ങള്ക്കായി തുറന്നുകൊടുക്കും. ‘- അദ്ദേഹം വ്യക്തമാക്കി. 2020 ആഗസ്റ്റിലാണ് പ്രധാനമന്ത്രി നരേന്ദ്ര മോദി ക്ഷേത്രത്തിന് തറക്കല്ലിട്ടത്.
Discussion about this post