ന്യൂഡല്ഹി: ലാവ്ലിന് കേസ് വിചാരണ വീണ്ടും മാറ്റിവച്ചുകൊണ്ട് സുപ്രീം കോടതി ഉത്തരവിട്ടു. കേസില് വാദം കേള്ക്കുന്നതില് നിന്ന് ജസ്റ്റിസ് സി.ടി. രവികുമാര് പിന്മാറിയതിനെ തുടര്ന്നാണിത്. ഹൈക്കോടതിയില് കേസ് പരിഗണിച്ചതിനാലാണ് രവികുമാര് വാദം കേള്ക്കുന്നതില് നിന്ന് പിന്മാറിയത്. കേസില് നിന്നും മുഖ്യമന്ത്രി ഉള്പ്പെടെയുള്ളവരെ കുറ്റവിമുക്തരാക്കിയതിനെതിരായ സിബിഐ ഹര്ജിയും, വിചാരണ നേരിടണമെന്ന ഹൈക്കോടതിയുടെ വിധിക്കെതിരെയുള്ള ഹര്ജിയുമാണ് സുപ്രീം കോടതി ഇന്ന് പരിഗണിക്കാനിരുന്നത്. ജസ്റ്റിസുമാരായ എം ആര് ഷാ, സി ടി രവികുമാര് എന്നിവര് അടങ്ങിയ ബെഞ്ചാണ് കേസ് പരിഗണിക്കാനിരുന്നത്. ജലവൈദ്യുത പദ്ധതികളുടെ നവീകരണത്തിന് കാനഡയിലെ എസ്എന്സി ലാവ്ലിന് കമ്പനിയുമായി കരാറുണ്ടാക്കിയതിലെ ക്രമക്കേട് വഴി 86.25 കോടി രൂപയുടെ നഷ്ടം ഖജനാവിന് ഉണ്ടാക്കിയെന്നതാണ് കേസ്.
മുപ്പത്തിമൂന്നാം തവണയാണ് ലാവ്ലില് കേസ് കോടതിയുടെ പരിഗണനയ്ക്കെത്തുന്നത്. രോഗബാധിതനായതിനാല് കേസ് ഇന്ന് പരിഗണിക്കരുതെന്ന് ഊര്ജ്ജവകുപ്പ് മുന് ജോയിന്റ് സെക്രട്ടറി എ ഫ്രാന്സിസിന്റെ അഭിഭാഷകന് സുപ്രീംകോടതി രജിസ്ട്രാര്ക്ക് കത്ത് നല്കിയിരുന്നു. കേസ് മൂന്നാഴ്ചത്തേക്ക് മാറ്റിവെയ്ക്കണമെന്നാണ് കത്തില് ആവശ്യപ്പെട്ടിരിക്കുന്നത്. സോളിറ്റര് ജനറല് തുഷാര് മേത്ത സിബിഐയ്ക്ക് വേണ്ടി ഹാജരായിരുന്നു.
പിണറായി വിജയന് ഉള്പ്പെടെയുള്ള മൂന്ന് പേരെ പ്രതിപ്പട്ടികയില് നിന്ന് ഒഴിവാക്കിയതിനെതിരെ 2017 ഡിസംബറിലാണ് സിബിഐ സുപ്രീം കോടതിയെ സമീപിക്കുന്നത്. പിണറായി വിജയന്, മുന് വൈദ്യുതി വകുപ്പ് സെക്രട്ടറി കെ. മോഹന ചന്ദ്രന്, വൈദ്യുതി വകുപ്പ് മുന് ജോയിന്റ് സെക്രട്ടറി എ ഫ്രാന്സിസ് എന്നിവരെയാണ് പ്രതിപ്പട്ടികയില് നിന്ന് ഒഴിവാക്കിയത്. കേസില് 2018 ജനുവരി 11ന് സുപ്രീം കോടതി നോട്ടീസ് അയച്ചു. പിന്നീട് നാല് വര്ഷത്തിനിടെ മുപ്പത്തിരണ്ട് തവണയാണ് ഹര്ജികള് പരിഗണിക്കുന്നത് മാറ്റി വച്ചത്. ഹര്ജി നിരന്തരം മാറി പോകുന്നെന്ന് കക്ഷി ചേര്ന്ന ടി.പി.നന്ദകുമാറിന്റെ അഭിഭാഷക എം കെ അശ്വതി ചൂണ്ടിക്കാട്ടിയതിനെ തുടര്ന്ന് ഇനി മാറ്റരുതെന്ന പുതിയ നിര്ദേശം കോടതി പുറപ്പെടുവിച്ചിരുന്നു. പക്ഷേ പിന്നീടും കേസ് മാറ്റി വച്ചു.
Discussion about this post