ന്യൂഡല്ഹി: നാളെ നടക്കുന്ന പുതിയ പാര്ലമെന്റ് മന്ദിരത്തിന്റെ ഉദ്ഘാടനത്തിന് മുന്നോടിയായി ചരിത്ര പ്രാധാന്യമുള്ള ചെങ്കോല് പ്രധാനമന്ത്രി നരേന്ദ്രമോദി ഏറ്റുവാങ്ങി. ബ്രിട്ടനില് നിന്ന് സ്വതന്ത്ര ഇന്ത്യയ്ക്ക് അധികാരം കൈമാറുന്നതിന്റെ പ്രതീകമായി ജവഹര്ലാല് നെഹ്റു ഏറ്റുവാങ്ങിയ പൊന്ചെങ്കോല് തമിഴ്നാട്ടില് നിന്നുള്ള പൂജാരിമാരുടെ സംഘമാണ് കൈമാറിയത്. പ്രധാനമന്ത്രിയുടെ ഓഫീസിലാണ് കൈമാറ്റം നടന്നത്. ഇന്ത്യയുടെ പരമാധികാരത്തിന്റെ ഓര്മ്മപ്പെടുത്തലായി സ്പീക്കറുടെ ഇരിപ്പിടത്തിനു സമീപം പ്രധാനമന്ത്രി നരേന്ദ്രമോദി ചെങ്കോല് സ്ഥാപിക്കും.
നെഹ്റുവിന്റെ വസതിയായിരുന്ന അലഹബാദിലെ ദേശീയ മ്യൂസിയത്തിലാണ് ചെങ്കോല് സൂക്ഷിച്ചിരുന്നത്. ഇന്ത്യയുടെ അവസാന ഗവര്ണര് ജനറല് രാജാജിയുടെ താത്പര്യപ്രകാരം തമിഴ്നാട്ടിലാണ് ചെങ്കോല് നിര്മ്മിച്ചത്. അധികാര കൈമാറ്റം എങ്ങനെയാവണമെന്ന് ബ്രിട്ടീഷ് വൈസ്രോയി മൗണ്ട് ബാറ്റണ് നെഹ്റുവിനോട് ചോദിച്ചതാണ് ചെങ്കോലിന്റെ പിറവിയിലേയ്ക്ക് നയിച്ചത്. രാജഗോപാലാചാരിയോടാണ് നെഹ്റു ഉപദേശം തേടിയത്. തമിഴ്നാട്ടില് ചോള രാജാക്കന്മാര് രാജപുരോഹിതനില് നിന്ന് ചെങ്കോല് ഏറ്റുവാങ്ങുന്ന രീതി സ്വീകരിക്കാമെന്ന് രാജാജി പറഞ്ഞു.
അദ്ദേഹം തമിഴ്നാട്ടിലെ തിരുവുടുതുറൈ മഠാധിപതിയെ ചുമതല ഏല്പിച്ചു. അന്നത്തെ മദ്രാസില് ജൂവലറി നടത്തിയിരുന്ന വുമ്മിടി ബങ്കാരു ചെട്ടിയാണ് മഠാധിപതിയുടെ നിര്ദ്ദേശങ്ങള് പാലിച്ച് ചെങ്കോല് നിര്മ്മിച്ചത്. വെള്ളിയില് നിര്മ്മിച്ച് സ്വര്ണം പൂശിയ ചെങ്കോലിന്റെ അഗ്രത്തില് പരമശിവന്റെ വാഹനമായ നന്ദിയുണ്ട്.. ‘സെങ്കോല്’ എന്ന തമിഴ് വാക്ക് ഉരുത്തിരിഞ്ഞത് നീതിയെന്ന അര്ത്ഥം വരുന്ന സെമ്മായ് എന്ന വാക്കില് നിന്നാണ്.
Discussion about this post