ന്യൂഡല്ഹി: തന്റെ മൂന്നാമത്തെ വരവില് ഇന്ത്യയെ ലോക സമ്പദ്വ്യവസ്ഥകളില് മൂന്നാം സ്ഥാനത്ത് എത്തിക്കുമെന്ന് ഉറപ്പു നല്കി പ്രധാനമന്ത്രി നരേന്ദ്രമോദി. നവീകരിച്ച പ്രഗതി മൈതാനത്തിന്റെ ഉദ്ഘാടന വേളയില് ജനങ്ങളെ അഭിസംബോധന ചെയ്ത് സംസാരിക്കുകയായിരുന്നു അദ്ദേഹം. നവീകരിച്ച പ്രഗതി മൈതാനത്തിന്റെ പേര് ‘ഭാരത് മണ്ഡപം’ എന്ന് പ്രധാനമന്ത്രി പുനര്നാമകരണവും ചെയ്തു. എന്റെ മൂന്നാം ഘട്ടത്തില്, ഇന്ത്യ ലോകത്തിലെ മികച്ച മൂന്നാമത്തെ സമ്പദ്വ്യവസ്ഥയായി മാറിയിരിക്കും. ഇത് മോദിയുടെ ഉറപ്പാണ്, എന്നായിരുന്നു അദ്ദേഹത്തിന്റെ വാക്കുകള്.
ഞങ്ങളുടെ ആദ്യ അവസരത്തില്, സമ്പദ്വ്യവസ്ഥയുടെ കാര്യത്തില് ഇന്ത്യ പത്താം സ്ഥാനത്തായിരുന്നു. എനിക്ക് ലഭിച്ച രണ്ടാം അവസരത്തില്, ഇന്ത്യ ലോകത്തിലെ അഞ്ചാമത്തെ വലിയ സമ്പദ്വ്യവസ്ഥയായിമാറി. മൂന്നാമത്തെ അവസരത്തില് ഞാന് നിങ്ങള്ക്ക് ഉറപ്പ് നല്കുന്നു, ഇന്ത്യയെ ലോകത്തെ മൂന്നാമത്തെ സാമ്പത്തിക ശക്തിയായി ഉയര്ത്തും.
ഭാരത് മണ്ഡപം പോലുള്ള കേന്ദ്രങ്ങള് രാജ്യത്തിന്റെ പ്രതിച്ഛായ വര്ദ്ധിപ്പിക്കുമ്പോള്, അത് തടയാന് ശ്രമിച്ചവരുണ്ട്. ഇത്തരം പ്രവര്ത്തനങ്ങള്ക്ക് തടസ്സം സൃഷ്ടിക്കാന് ശ്രമിച്ചവര് ഉണ്ട്. നിര്ത്താന് ശ്രമിച്ച ഒരുപാട് പേരുണ്ട്. പക്ഷേ എനിക്ക് ഒരു കാര്യത്തില് ഉറപ്പുണ്ടായിരുന്നു അന്ന് എതിര്ക്കാന് ശ്രമിച്ചവരൊക്കെ ഇവിടെ ഒരു ആവശ്യത്തിന് എത്തുമെന്ന്. പ്രധാനമന്ത്രി പറഞ്ഞു.
Discussion about this post