തിരുവനന്തപുരം: ആദ്യാക്ഷര മധുരം നുകര്ന്ന് അറിവിന്റെ ലോകത്തേക്ക് ചുവടുവച്ച് കുരുന്നുകള്. ക്ഷേത്രങ്ങളിലും ആശ്രമങ്ങളിലും വിദ്യാരംഭച്ചടങ്ങുകള് നടന്നു. ചേങ്കോട്ടുകോണം ശ്രീരാമദാസ ആശ്രമത്തില് നടന്ന വിദ്യാരംഭ ചടങ്ങില് ആശ്രമം സെക്രട്ടറി സ്വാമി യോഗാനന്ദ സരസ്വതി കുട്ടികള്ക്ക് ആദ്യാക്ഷരം പകര്ന്നു നല്കി.
നിരവധി സാംസ്കാരിക സംഘടനകളും വിദ്യാരംഭ ചടങ്ങുകളുമായി രംഗത്തുണ്ട്. സാഹിത്യ, സാമൂഹിക രംഗത്തെ പ്രമുഖര് ഉള്പ്പെടെ കുട്ടികളെ എഴുത്തിനിരുത്തി. പനച്ചിക്കാട് ക്ഷേത്രമടക്കമുള്ള ആരാധനാലയങ്ങളിലും, മലപ്പുറത്ത് തുഞ്ചന് പറമ്പ് അടക്കമുള്ള സാംസ്കാരിക കേന്ദ്രങ്ങളിലും എഴുത്തിനിരുത്തല് ചടങ്ങ് നടന്നു.
ഗുരുവിന്റെ മടിയിലിരുന്ന് തളികയിലെ അരിയില് ചൂണ്ടുവിരല്കൊണ്ട് ആദ്യക്ഷരം. പിന്നെ പൊന്നു തൊട്ട് നാവില് അക്ഷര മധുരം. വിജയദശമി ദിനത്തില് സംസ്ഥാനത്ത് ഇന്ന് പതിനായിരക്കണക്കിന് കുട്ടികളാണ് ആദ്യക്ഷരമെഴുതിയത്. സംസ്ഥാനത്തെ സരസ്വതീ ക്ഷേത്രങ്ങളില് പുലര്ച്ചെ മുതല് അക്ഷരം കുറിക്കാന് വലിയ തിരക്കാണ് അനുഭവപ്പെട്ടത്. നിരവധി സാംസ്കാരിക കേന്ദ്രങ്ങളിലും വായനശാലകളിലും വിദ്യാരംഭ ചടങ്ങുകള് നടന്നു. ഭാഷാ പിതാവിന്റെ ജന്മനാടായ തിരൂര് തുഞ്ചന് പറമ്പിലും വിദ്യാരംഭ ചടങ്ങുകള് പുലര്ച്ചെ തന്നെ ആരംഭിച്ചിരുന്നു. പാരമ്പര്യ എഴുത്താശാന്മാരും കവികളും സാഹിത്യകാരന്മാരുമാണ് ഇവിടെ കുരുന്നുകള്ക്ക് അറിവിന്റെ ആദ്യാക്ഷരം പകര്ന്നത്.
