ശബരിമല: ശബരിമല തീര്ത്ഥാടകര്ക്കും ദിവസവേതനക്കാര് ഉള്പ്പടെ എല്ലാ ജീവനക്കാര്ക്കും അപകട ഇന്ഷുറന്സുമായി ദേവസ്വം ബോര്ഡ്. അപകട മരണം സംഭവിച്ചാല് അഞ്ച് ലക്ഷം രൂപ ആശ്രിതര്ക്ക് ലഭിക്കും. ഒരു വര്ഷത്തെ കാലാവധിയാണ് ഇന്ഷുറന്സിനുള്ളത്.
പത്തനംതിട്ടയ്ക്ക് പുറമേ ആലപ്പുഴ, കോട്ടയം, ഇടുക്കി ജില്ലകളില് എവിടെയും ഉണ്ടാകുന്ന അപകടത്തിന് തീര്ത്ഥാടകര്ക്ക് ഇന്ഷുറന്സ് ലഭിക്കും. തിരുവിതാംകൂര് ദേവസ്വം ബോര്ഡാകും പ്രീമിയം തുക വഹിക്കുക. പരിക്കേറ്റവര്ക്ക് ചികിത്സാ ചെലവ് നല്കുന്നത് സംബന്ധിച്ച് ചര്ച്ചകള് പുരോഗമിക്കുകയാണ്. 2,000-ത്തോളം ദിവസവേതനക്കാരാണ് ശബരിമലയില് തീര്ത്ഥാടനകാലത്ത് ജോലിക്കെത്തുക.
സന്നിധാനത്തോ പരിസരത്തോ ഇടത്താവളങ്ങളിലോ ഹൃദയാഘാതത്തിലോ അപകടത്തിലോ തീര്ത്ഥാടകര് മരിച്ചാല് ആംബുലന്സില് മൃതദേഹം നാട്ടിലെത്തിക്കും. സംസ്ഥാനത്തിനകത്ത് ഇതിന് 30,000 രൂപയും കേരളത്തിന് പുറത്ത് എത്തിക്കാനായി ഒരു ലക്ഷം രൂപ വരെയും ചെലവിടും. ഈ തുക ഇന്ഷുറന്സ് കമ്പനി ദേവസ്വം ബോര്ഡിന് നല്കും. ഇന്ഷുറന്സിന് പുറമേ ക്ഷേമപദ്ധതികള്ക്ക് പ്രത്യേകനിധി രൂപവത്കരിക്കുന്നത് പരിഗണിക്കുന്നതായി ദേവസ്വം പ്രസിഡന്റ് പി.എസ് പ്രശാന്ത് അറിയിച്ചു.
Discussion about this post