കാലടി: ആദിശങ്കര ജന്മദേശ വികസന സമിതിയുടെ ആഭിമുഖ്യത്തില് കാലടിയില് നടക്കുന്ന ശ്രീശങ്കര ജയന്തി ആഘോഷങ്ങളുടെ ഭാഗമായി സന്യാസി സംഗമം നടന്നു.
കാലടി ശൃംഗേരി മഠത്തില് നടന്ന സന്യാസി സംഗമം ജുന അഖാഡ മഹാമണ്ഡലേശ്വര് സ്വാമി ആനന്ദവനം ഭാരതി ഉദ്ഘാടനം നിര്വഹിച്ചു. ശ്രീരാമദാസ മിഷന് അധ്യക്ഷന് ശ്രീശക്തി ശാന്താനന്ദ മഹര്ഷി തൃപ്പാദങ്ങള് അധ്യക്ഷത വഹിച്ച സന്യാസി സംഗമത്തില് വാഴൂര് തീര്ത്ഥപാദാശ്രമം മഠാധിപതി സ്വാമി പ്രജ്ഞാനന്ദ തീര്ത്ഥപാദര്, പാലക്കാട് ദയാനന്ദാശ്രമം സ്വാമി കൃഷ്ണാത്മാനന്ദ സരസ്വതി എന്നിവര് ശ്രീശങ്കര സന്ദേശം നല്കി. സ്വാമി ശ്രീനാരായണ തീര്ത്ഥ (ശിവഗിരി മഠം), വേദാമൃതാനന്ദപുരി(അമൃതാനന്ദമയി മഠം), ദര്ശനാനന്ദ സരസ്വതി (വേദര്ഷി ആശ്രമം പൂഞ്ഞാര്), സത്യപ്രിയാനന്ദ സരസ്വതി(ശിവാനന്ദാശ്രമം പാലക്കാട്), സ്വാമി അയ്യപ്പദാസ് (തത്വമസി ആശ്രമം തൊടുപുഴ), സ്വാമി കൃഷ്ണമയാനന്ദ തീര്ത്ഥപാദര് (പന്മന ആശ്രമം), സ്വാമി നന്ദാത്മജാനന്ദ (ശ്രീരാമകൃഷ്ണ മിഷന്, തൃശ്ശൂര്), മാര്ഗ്ഗദര്ശക മണ്ഡലം ജനറല് സെക്രട്ടറി സ്വാമി സത്സ്വരൂപാനന്ദ സരസ്വതി, സ്വാമി സത്യാനന്ദപുരി(അദ്വൈതാശ്രമം കോഴിക്കോട്) എന്നിവര് ചടങ്ങില് അനുഗ്രഹ ഭാഷണം നടത്തി. വിശ്വഹിന്ദുപരിഷത്ത് അന്താരാഷ്ട്ര പ്രസിഡണ്ട് അഡ്വക്കേറ്റ് അലോക് കുമാര് ചടങ്ങില് മുഖ്യാതിഥിയായി.
ചടങ്ങില് സ്വാമി ദര്ശനാനന്ദ സരസ്വതി രചിച്ച ‘അദ്വൈത ദര്ശനം ഒരു സംക്ഷിപ്ത ചരിത്രം’ എന്ന പുസ്തകം മഹാമണ്ഡലേശ്വര് ആനന്ദവനം ഭാരതി സ്വാമികള് സത്സ്വരൂപാനന്ദ സരസ്വതി സ്വാമിക്ക് നല്കിക്കൊണ്ട് പ്രകാശനം നിര്വഹിച്ചു. ശങ്കര ജയന്തിയുടെ ഭാഗമായി നടന്ന അഖിലകേരള ശങ്കര സ്തോത്രം ആലാപന മത്സര വിജയികള്ക്ക് ചടങ്ങില് സമ്മാനദാനം നല്കി. കേരളത്തിന്റെ വിവിധ ആശ്രമങ്ങളില് നിന്നും നൂറുകണക്കിന് സന്യാസി ശ്രേഷ്ഠന്മാര് സംഗമത്തിന്റെ ഭാഗമായി.
