ന്യൂഡല്ഹി: മുല്ലപ്പെരിയാര് പ്രശ്നം പരിഹരിക്കാന് ഫലപ്രദമായ നടപടികളെല്ലാം ഉണ്ടാകുമെന്നു പ്രധാനമന്ത്രി ഡോ. മന്മോഹന് സിംഗ്. ഇക്കാര്യത്തില് ഉടന് തന്നെ മുന്കൈയെടുക്കും. മുല്ലപ്പെരിയാര് പ്രശ്നത്തില് കേരളവും തമിഴ്നാടും തമ്മിലുള്ള തര്ക്കത്തില് കോടതിക്കു പുറത്ത് ഒരു പരിഹാരമുണ്ടാക്കാന് ഇടപെടണമെന്ന് ആവശ്യപ്പെട്ട് തന്നെ സന്ദര്ശിച്ച കേരള എംപിമാര്ക്കാണു പ്രധാനമന്ത്രി ഈ ഉറപ്പുനല്കിയത്.
മുല്ലപ്പെരിയാര് വിഷയത്തില് കേരളത്തിലെയും തമിഴ്നാട്ടിലെയും ജനങ്ങള്ക്കിടയില് പ്രശ്നമുണ്ടാകാതെ നോക്കണമെന്നും ഇതൊരു വൈകാരിക പ്രശ്നമായി കാണരുതെന്നും പ്രധാനമന്ത്രി ആവശ്യപ്പെട്ടു. അതേസമയം, മുല്ലപ്പെരിയാര് പ്രശ്നത്തില് കേന്ദ്രം തിരക്കിട്ട് ഇടപെടില്ലെന്നു കേന്ദ്ര നിയമമന്ത്രി സല്മാന് ഖുര്ഷിദ് മാധ്യമ പ്രവര്ത്തകരെ അറിയിച്ചു.
ഇരുസംസ്ഥാനങ്ങളിലെയും മുഖ്യമന്ത്രിമാരുമായി സംസാരിക്കാമെന്നു പ്രധാനമന്ത്രി എംപിമാര്ക്ക് ഉറപ്പുനല്കി. പ്രശ്ന പരിഹാരത്തിനായി ഒരിക്കല് ഇരുമുഖ്യമന്ത്രിമാരെയും വിളിച്ചു കൂട്ടിയതാണെന്നും ഫലമുണ്ടായില്ലെന്നും അദ്ദേഹം ചൂണ്ടിക്കാട്ടി. ജനങ്ങളുടെ സുരക്ഷ കണക്കിലെടുത്തു പ്രശ്നപരിഹാരത്തിനു കേന്ദ്രം മുന്കൈ എടുക്കണമെന്ന് എംപിമാര് ആവശ്യപ്പെട്ടു. പാര്ലമെന്റിലെ പ്രധാനമന്ത്രിയുടെ ഓഫീസിലാണ് എംപിമാര് അദ്ദേഹവുമായി കൂടിക്കാഴ്ച നടത്തിയത്. കേരളത്തിന്റെ അവസ്ഥ പൂര്ണമായും പ്രധാനമന്ത്രി യെ ബോധിപ്പിക്കാന് കഴിഞ്ഞെന്ന് എംപിമാര് പറഞ്ഞു.
എംപിമാരായ പ്രഫ. പി.ജെ. കുര്യന്, പി.സി. ചാക്കോ, ശശി തരൂര്, ഇ.ടി. മുഹമ്മദ് ബഷീര്, കൊടിക്കുന്നില് സുരേഷ്, പി.ടി. തോമസ്, കെ.പി. ധനപാലന്, ആന്റോ ആന്റണി, പീതാംബരക്കുറുപ്പ്, എം.പി. അച്യുതന്, ജോസ് കെ. മാണി, ടി.എന്. സീമ, കെ.എന്. ബാലഗോപാല്, പി. രാജീവ് തുടങ്ങിയവരാണു സംഘത്തിലുണ്ടായിരുന്നത്. എന്നാല്, വിഷയം സുപ്രീംകോടതിയുടെ പരിഗണനയിലായതിനാല് ഇപ്പോള് ഇടപെടാനാവില്ലെന്നാണു മാധ്യമപ്രവര്ത്തകരോടു സംസാരിക്കവേ നിയമമന്ത്രി സല്മാന് ഖുര്ഷിദ് പറഞ്ഞത്. പ്രശ്നത്തിന്റെ ഗൗരവം കേന്ദ്ര സര്ക്കാരിന് അറിയാം. എന്നാല്, കോടതി നിര്ദേശിച്ചാല് ഇടപെടാന് തയാറാണ്.
കോടതിയുടെ പരിഗണനയിലിരിക്കുന്ന വിഷയമായതിനാല് കേന്ദ്രം ഇടപെടുന്നതിനു തടസങ്ങളുണ്ടെന്നും ഖുര്ഷിദ് വ്യക്തമാക്കി.ഇതേ ആവശ്യം ഉന്നയിച്ചു കേരളത്തിലെ സര്വകക്ഷി യോഗത്തിന്റെ തീരുമാനവും സംസ്ഥാനത്തിന്റെ ആശങ്കയും അറിയിക്കുന്നതിനായി ജലവിഭവ മന്ത്രി പി.ജെ. ജോസഫും റവന്യൂമന്ത്രി തിരുവഞ്ചൂര് രാധാകൃഷ്ണനും അടുത്തയാഴ് ച ഡല്ഹിയില് എത്തുന്നുണ്ട്. ഇതേസമയത്തുതന്നെ തമിഴ്നാട്ടില് നിന്നു സര്വകക്ഷി സംഘം ഡല്ഹിയില് എത്തുമെന്നും സൂചനയുണ്ട്. കേരളം ഉയര്ത്തുന്ന ആവശ്യത്തിനു തടയിടുകയാണ് അവരുടെ ലക്ഷ്യം.
Discussion about this post