തിരുവനന്തപുരം: എയര് ഇന്ത്യ കേരളത്തില് നിന്നുള്ള വിമാന സര്വ്വീസുകള് റദ്ദു ചെയ്തതിനെത്തുടര്ന്നുള്ള പ്രതിസന്ധി മറികടക്കാന് പ്രധാനമന്ത്രി അടിയന്തരമായി ഉന്നതതല യോഗം വിളിച്ചുചേര്ക്കണമെന്ന് സി.പി.ഐ (എം) സംസ്ഥാന സെക്രട്ടറി പിണറായി വിജയന് ആവശ്യപ്പെട്ടു.
കേന്ദ്ര വ്യോമയാനമന്ത്രി, എയര് ഇന്ത്യ മാനേജിംഗ് ഡയറക്ടര്, വ്യോമയാനവകുപ്പ് മേധാവികള് എന്നിവരുള്പ്പെടെയുള്ളവരുടെ യോഗം പ്രധാനമന്ത്രി വിളിച്ചുചേര്ത്ത് കേരളം അഭിമുഖീകരിക്കുന്ന പ്രതിസന്ധിക്ക് അടിയന്തിരമായി പരിഹാരമുണ്ടാക്കണം. ഇന്ത്യയിലെ മറ്റൊരു സംസ്ഥാനത്തോടും കാണിക്കാത്ത അവഗണനയും ക്രൂരതയുമാണ് കേരളത്തോട് എയര് ഇന്ത്യ പുലര്ത്തുന്നത്. ബഹുജനാഭിപ്രായം ശക്തിപ്പെട്ടതിനെത്തുടര്ന്ന് മുന് എല്.ഡി.എഫ് സര്ക്കാരിന്റെ കാലത്ത് എയര് ഇന്ത്യ കേരളത്തിലെ ഗള്ഫ് യാത്രക്കാരെ പ്രധാനമായി ഉദ്ദേശിച്ച് ആരംഭിച്ചതാണ് ബജറ്റ് എയര്ലൈനായ എയര് ഇന്ത്യാ എക്സ്പ്രസ്. കൂടുതല് സര്വ്വീസുകള് ഓപ്പറേറ്റ് ചെയ്യുന്ന സംസ്ഥാനമെന്ന പരിഗണനയില് എയര് ഇന്ത്യാ എക്സ്പ്രസ്സിന്റെ ഓഫീസ് കൊച്ചിയില് തുറക്കുക പോലും ചെയ്തു. എന്നാല്, ഏതാനും മാസങ്ങള്ക്കു മുമ്പ് ആ ഓഫീസ് പൂട്ടി. കഴിഞ്ഞ ഒരു മാസത്തിനുള്ളില് കേരളത്തിലെ 168 വിമാന സര്വ്വീസുകളാണ് എയര് ഇന്ത്യ റദ്ദാക്കിയത്. ഒക്ടോബര് അവസാനം വരെ സര്വ്വീസ് റദ്ദാക്കല് തുടരും എന്നാണ് വ്യക്തമാകുന്നത്.
പെട്ടെന്ന് സര്വ്വീസുകള് റദ്ദാക്കുന്നതിന്റെ ഫലമായി കേരളീയരായ യാത്രക്കാര് വിവരണാതീതമായ ക്ലേശങ്ങള്ക്ക് വിധേയരാവുകയാണ്. കേന്ദ്രസര്ക്കാരിന്റെയും എയര് ഇന്ത്യയുടെയും ദ്രോഹനയത്തില് അതിശക്തമായ പ്രതിഷേധം ഉയര്ത്താന് എല്ലാ വിഭാഗം ജനങ്ങളോടും പിണറായി വിജയന് പ്രസ്താവനയില് അഭ്യര്ത്ഥിച്ചു.
Discussion about this post