തിരുവനന്തപുരം: കോടതിഭാഷ നിര്ബന്ധമായും മലയാളമാവണമെന്ന് സാംസ്കാരികമന്ത്രി കെ.സി.ജോസഫ് ഇതിനുള്ള ശ്രമങ്ങള് നടന്നുവരുന്നതായും മന്ത്രി തുടര്ന്ന് പറഞ്ഞു. നിയമവകുപ്പ് തയ്യാറാക്കിയ നിയമധ്വനി, ഔദ്യോഗികഭാഷാ കമ്മീഷന് പരിഭാഷപ്പെടുത്തിയ പദങ്ങള് ഉള്പ്പെടുത്തി പ്രസിദ്ധീകരിച്ച നിയമശബ്ദതാരാവലി എന്നിവയുടെ പ്രകാശനകര്മ്മം സെക്രട്ടേറിയറ്റ് ദര്ബാര് ഹാളില് നിര്വ്വഹിക്കുകയായിരുന്നു അദ്ദേഹം.
ചടങ്ങില് ഔദ്യോഗിക ഭാഷാ സമിതിയധ്യക്ഷന് പാലോട് രവി എം.എല്.എ. അധ്യക്ഷത വഹിച്ചു. കോടതിവിധികള് ആരെ ഉദ്ദേശിച്ചാണോ അവര്ക്ക് വായിച്ചാല് മനസിലാക്കാന് കഴിയണം. വിധി മനസ്സിലാക്കാന് കഴിയാതെ നിരവധി പേര് കബളിപ്പിക്കപ്പെട്ട കാര്യം മന്ത്രി ചൂണ്ടിക്കാട്ടി. കോടതി ഭാഷ മലയാളത്തിലാക്കാന് നിയമവകുപ്പിന്റെ സഹായം അനിവാര്യമാണ്. മലയാളം ശ്രേഷ്ഠഭാഷ പദവി നേടുന്നതുള്പ്പെടെ ശ്രദ്ധേയമായ പലനേട്ടങ്ങളും മാതൃഭാഷയ്ക്കായി നേടാന് സര്ക്കാരിന് കഴിഞ്ഞിട്ടുണ്ട്. നിയമധ്വനിയും, നിയമശബ്ദതാരാവലിയും നിയമപദങ്ങള് മലയാളത്തില് മനസ്സിലാക്കാന് സഹായകമാവുമെന്നും മന്ത്രി പറഞ്ഞു. അറിയാനുള്ള അവകാശം ജനാധിപത്യത്തിന്റെ ആണിക്കല്ലായതിനാല് കോടതിഭാഷ മലയാളത്തില്തന്നെ വേണമെന്ന് അധ്യക്ഷ പ്രസംഗത്തില് പാലോട് രവി എം.എല്.എ. പറഞ്ഞു. നരേന്ദ്രന് കമ്മീഷന് റിപ്പോര്ട്ട് നടപ്പിലാക്കാന് നിയമവകുപ്പ് തുടക്കം കുറിച്ചത് അഭിനന്ദനീയമാണെന്നും അദ്ദേഹം പറഞ്ഞു. നിയമജേര്ണലിന് നിയമധ്വനി എന്ന പേര് നിര്ദ്ദേശിച്ച നിയമ സെക്രട്ടേറിയറ്റിലെ അണ്ടര് സെക്രട്ടറി ടി.എ.രമാദേവി, സെക്ഷന് ഓഫീസര് ബിനുമോള്, അസിസ്റ്റന്റ് രാജ്കുമാര് എന്നിവര്ക്ക് ചടങ്ങില് മന്ത്രി സമ്മാനങ്ങള് വിതരണം ചെയ്തു.
നിയമസെക്രട്ടറി സി.പി.രാമരാജപ്രേമപ്രസാദ് സ്വാഗതവും, ഔദ്യോഗികഭാഷാ നിയമനിര്മ്മാണ സമിതി ചെയര്മാന് ശ്രീകുമാരന് നായര് നന്ദിയും പറഞ്ഞു.
