ന്യൂഡല്‍ഹി: ഏറെ വിവാദം സൃഷ്ടിച്ച ആരുഷി – ഹേംരാജ് ഇരട്ടക്കൊലക്കേസില്‍ ആരുഷിയുടെ മാതാപിതാക്കള്‍ കുറ്റക്കാരെന്ന് കോടതി. ഇരട്ടക്കൊലക്കേസില്‍ ഡോക്ടര്‍ ദമ്പതികളായ രാജേഷ് തല്‍വാറും നൂപുര്‍ തല്‍വാറും കുറ്റക്കാരാണെന്നാണ് കോടതി കണ്ടെത്തി. ഗാസിയാബാദ് സിബിഐ പ്രത്യേക കോടതി ഇവര്‍ക്കുള്ള ശിക്ഷ നാളെ വിധിക്കും. കൊലപാതകം, ഗൂഢാലോചന, തെളിവ് നശിപ്പിക്കല്‍ എന്നീ കുറ്റങ്ങളാണ് ഇരുവര്‍ക്കുമെതിരെ ചുമത്തിയത്. 15 മാസത്തെ വിചാരണയ്ക്ക് ശേഷം പ്രത്യേക ജഡ്ജി എസ്. ലാലാണ് ഇരുവരും കുറ്റക്കാരാണെന്ന് വിധിച്ചത്. വിധി കേട്ട് ഇരുവരും കോടതിയില്‍ പൊട്ടിക്കരഞ്ഞു. തെറ്റൊന്നും ചെയ്തിട്ടില്ലെന്നും വിധിയില്‍ നിരാശയുണ്ടെന്നും നീതിക്കായി നിയമ പോരാട്ടം തുടരുമെന്നും ഇരുവരും വാര്‍ത്താകുറിപ്പിലൂടെ അറിയിച്ചു. വിധി വന്ന ശേഷം ഇരുവരെയും ജയിലിലേക്ക് മാറ്റി. 14കാരിയായ സ്‌കൂള്‍ വിദ്യാര്‍ഥിനി ആരുഷി 2008 മെയ് 15നു രാത്രിയിലാണ് കൊല്ലപ്പെട്ടത്. തൊട്ടടുത്ത ദിവസം വീട്ടുജോലിക്കാരന്റെ മൃതദേഹം വീടിന്റെ ടെറസില്‍ നിന്നു കണ്ടെത്തി. ആരുഷിയെയും ഹേംരാജിനെയും സംശയകരമായ സാഹചര്യത്തില്‍ കണ്ടതിനെ തുടര്‍ന്ന് രാജേഷ് കൊലപ്പെടുത്തിയെന്നും ഇതിന് നൂപുര്‍ കൂട്ടു നിന്നെന്നുമാണു കേസ്. നോയിഡ പൊലീസാണ് ആദ്യം കേസന്വേഷിച്ചത്. പിന്നീട് യുപി സര്‍ക്കാര്‍ അന്വേഷണം സിബിഐയ്ക്കു കൈമാറുകയായിരുന്നു. നിരവധി വഴിത്തിരിവുകള്‍ കേസില്‍ ഉണ്ടായി. പെണ്‍കുട്ടിയെ കൊന്നശേഷം ഹേംരാജ് രക്ഷപ്പെട്ടുവെന്നായിരുന്നു ഉത്തര്‍പ്രദേശ് പോലീന്റെ നിഗമനം. എന്നാല്‍ അടുത്ത ദിവസം ഹേംരാജിന്റെ മൃതദേഹം വീട്ടിലെ ടെറസില്‍ കണ്ടെത്തുകയായിരുന്നു. പെണ്‍കുട്ടിയുടെ പിതാവാണ് പ്രതിയെന്ന നിലയിലായി പിന്നീട് അന്വേഷണം. ഇതിനിടെ കേസ് സിബിഐയ്ക്ക് കൈമാറി. തല്‍വാര്‍ ദമ്പതിമാരുടെ സഹായികളാണ് കൊലപാതകം നടത്തിയതെന്നാണ് ആദ്യ സിബിഐ സംഘം കണ്ടെത്തിയത്. പിന്നീട് ദമ്പതിമാര്‍ തന്നെയാണ് കൊലപാതകം നടത്തിയതെന്ന കണ്ടെത്തലില്‍ സിബിഐ എത്തുകയായിരുന്നു.
ആരുഷി-ഹേംരാജ് ഇരട്ടക്കൊല: മാതാപിതാക്കള്‍ കുറ്റക്കാര്‍
പുതിയ വാർത്തകൾ
Discussion about this post