പുതുക്കിയ ബസ് യാത്രാ നിരക്കുകള്‍ ഇന്ന് അര്‍ദ്ധരാത്രി മുതല്‍ നിലവില്‍ വരും

തിരുവനന്തപുരം: സംസ്ഥാനത്തെ പുതുക്കിയ ബസ് യാത്രാ നിരക്കുകള്‍ ഇന്ന് അര്‍ദ്ധരാത്രി മുതല്‍ നിലവില്‍ വരും. സിറ്റി, ഓര്‍ഡിനറി സര്‍വീസ് ബസുകളുടെ മിനിമം ചാര്‍ജ് ആറില്‍ നിന്ന് ഏഴു രൂപയായും ഫാസ്റ് പാസഞ്ചര്‍ ബസുകളുടേത് എട്ടില്‍ നിന്നു 10 രൂപയുമായാണു വര്‍ധിപ്പിച്ചിരിക്കുന്നത്. ബസുകളുടെ കിലോമീറ്റര്‍ നിരക്കിലും ആനുപാതികമായ വര്‍ദ്ധന വരുത്തിയിട്ടുണ്ട്. സൂപ്പര്‍ ഫാസ്റിന്റേത് 12ല്‍ നിന്ന് 13 രൂപയായും സൂപ്പര്‍ എക്സ്പ്രസിന്റേത് 17ല്‍ നിന്ന് 20 രൂപയായും സൂപ്പര്‍ ഡീലക്സ്/ സെമി സ്ളീപ്പറിന്റേത് 25ല്‍ നിന്ന് 28 രൂപയായും വര്‍ദ്ധിക്കും. ലക്ഷ്വറി, ഹൈടെക് എസി, വോള്‍വോ ബസുകളുടെ മിനിമം നിരക്ക് അഞ്ചുരൂപ വര്‍ധിച്ച് 35ല്‍ നിന്ന് 40 രൂപയും മള്‍ട്ടി ആക്സില്‍ സര്‍വീസുകളുടെ മിനിമം നിരക്ക് 70 രൂപയുമായാണ് വര്‍ദ്ധിക്കുന്നത്. ഓര്‍ഡിനറി നിരക്ക് കിലോമീറ്ററിന് 58 പൈസയില്‍ നിന്ന് 64 ആയും സിറ്റി ഫാസ്റ്, ലിമിറ്റഡ് സ്റോപ്പ്, ഫാസ്റ് പാസഞ്ചര്‍ നിരക്കുകള്‍ 62ല്‍ നിന്ന് 68 പൈസയായും സൂപ്പര്‍ ഫാസ്റിന്റേത് 65ല്‍ നിന്ന് 72 പൈസയായും സൂപ്പര്‍ എക്സ്പ്രസിന്റേത് 70ല്‍ നിന്ന് 77 പൈസയായും വര്‍ധിപ്പിച്ചു. സൂപ്പര്‍ ഡീലക്സ്, സെമി സ്ളീപ്പറിന്റേത് 80ല്‍ നിന്ന് 88 പൈസയായും ലക്ഷ്വറി, ഹൈടെക് എസിയുടേത് ഒരു രൂപയില്‍ നിന്ന് 1.10 രൂപയായും വോള്‍വോ ബസുകളുടേത് ഒന്നില്‍ നിന്ന് 1.30 രൂപയായും പുതുതായി സര്‍വീസ് ആരംഭിച്ച മള്‍ട്ടി ആക്സില്‍ ബസുകളുടെ കിലോമീറ്റര്‍ ചാര്‍ജ് 1.91 രൂപയായുമാണ് വര്‍ധിക്കുന്നത്.