ചെന്നൈ: വിഴിഞ്ഞം ആന്താരാഷ്ട്ര തുറമുഖ പദ്ധതിയുടെ ടെന്ഡര് നടപടികള് തുടരാന് ദേശീയ ഹരിത ട്രൈബ്യൂണല് അനുമതി നല്കി. തുറമുഖത്തിന്റെ പാരിസ്ഥിതികാനുമതി റദ്ദാക്കണമെന്ന് ആവശ്യപ്പെട്ടു കോസ്റ്റല് വാച്ച് എന്ന സംഘടന സമര്പ്പിച്ച ഹര്ജി പരിഗണിക്കവേയാണു ട്രൈബ്യൂണല് ദക്ഷിണ മേഖല ബെഞ്ച് അനുമതി നല്കിയത്. കോസ്റ്റല് വാച്ചിനെ പ്രതിനിധീകരിച്ച് തിരുവനന്തപുരം സ്വദേശികളായ മൈക്കിള്, ക്രിസ്റ്റഫര്, ജോസഫ് എന്നിവരാണു ട്രൈബ്യൂണലിനെ സമീപിച്ചത്. കേസ് നടക്കുന്നതിനാല് ടെന്ഡര് നടപടികള് താല്ക്കാലികമായി തടയണമെന്ന് ഇവര് ആവശ്യപ്പെട്ടുവെങ്കിലും ട്രൈബ്യൂണല് അംഗീകരിച്ചില്ല. തുടര്വാദം കേള്ക്കുന്നതു ജൂലൈ ഒന്നിലേക്ക് മാറ്റി.
അഞ്ചു പ്രമുഖ കമ്പനികള് ടെന്ഡര് നല്കിയിട്ടുണ്ടെന്നും ഇവയില് തീരുമാനമെടുക്കാന് അടുത്ത മാസം 18ന് നടപടി ആരംഭിക്കാനിരിക്കെ മാറ്റം വരുത്തിയാല് പല കമ്പനികളും പിന്മാറുമെന്നും കേരള സര്ക്കാരിന്റെയും സീപോര്ട്ട് അതോറിറ്റിയുടെയും അഭിഭാഷകര് വാദിച്ചു. ഇത് അംഗീകരിച്ചാണു ടെന്ഡര് നടപടികള്ക്കു തടസ്സമില്ലെന്നു ജസ്റ്റിസ് ചൊക്കലിംഗം, വിദഗ്ധ സമിതിയംഗം ആര്. നാഗരാജന് എന്നിവര് അറിയിച്ചു.
പാരിസ്ഥിതികാനുമതി റദ്ദാക്കുന്നതിനൊപ്പം തുറമുഖവുമായി ബന്ധപ്പെട്ട എല്ലാ നടപടികളും നിര്ത്തിവയ്ക്കണമെന്നാണു ഹര്ജിക്കാരുടെ ആവശ്യം. വിഴിഞ്ഞം മണ്ണിടിച്ചില് കൂടുതലുള്ള മേഖലയാണെന്നും തുറമുഖ പദ്ധതി മണ്ണിടിച്ചില് വര്ധിപ്പിക്കുമെന്നും തീരദേശവാസികള്ക്ക് ഒഴിഞ്ഞു പോകേണ്ടി വരുമെന്നും ഹര്ജിയില് പറയുന്നു. തീരദേശ ഹോട്ടല് ലോബിയുടെ പിന്ബലത്തോടെയാണ് ഇവര് അനാവശ്യവാദം ഉന്നയിക്കുന്നതെന്ന് നാട്ടുകാര് ആരോപിച്ചു. തുറമുഖം തീരദേശത്തു പ്രവര്ത്തിക്കുന്ന അനധികൃത റിസോര്ട്ടുകളെ പ്രതികൂലമായി ബാധിക്കുമെന്നതിനാല് പലതരത്തിലും തടസവാദങ്ങളുന്നയിച്ച് ഹോട്ടല് ലോബി നേരത്തേ തന്നെ രംഗത്തു വന്നിരുന്നു.
