തിരുവനന്തപുരം: പോലീസ് നടത്തുന്ന ട്രാഫിക് പരിശോധനകള്‍ ഇനിമുതല്‍ വീഡിയോയില്‍ പകര്‍ത്തണമെന്ന ഉത്തരവ് കര്‍ശനമായി പാലിക്കുന്നുണ്ടെന്ന് ഉറപ്പുവരുത്താന്‍ എല്ലാ ജില്ലാ പോലീസ് മേധാവിമാര്‍ക്കും സംസ്ഥാന പോലീസ് മേധാവി കെ.എസ്.ബാലസുബ്രഹ്മണ്യന്‍ നിര്‍ദ്ദേശം നല്‍കി.
പരിശോധനയ്ക്കായി വാഹനങ്ങള്‍ നിര്‍ത്തിക്കുന്നതും പിഴ ഈടാക്കുന്നതും ഉള്‍പ്പെടെ പരിശോധനയുമായി ബന്ധപ്പെട്ട് നടത്തുന്ന നടപടികളെല്ലാം വീഡിയോയില്‍ പകര്‍ത്തുന്നുവെന്ന് ഉറപ്പുവരുത്തണം. അടിയന്തര സാഹചര്യങ്ങളിലോ അപ്രതീക്ഷിത കാരണങ്ങളാലോ അല്ലാതെ വീഡിയോ ക്യാമറയില്‍ പകര്‍ത്താതെ വാഹന പരിശോധന നടത്തുന്നവര്‍ക്കെതിരെ കര്‍ശന നടപടിയെടുക്കാനും സംസ്ഥാന പോലീസ് മേധാവി ജില്ലാ പോലീസ് മേധാവികള്‍ക്ക് നിര്‍ദ്ദേശം നല്‍കി. എല്ലാ കണ്‍ട്രോള്‍ റൂം വാഹനങ്ങള്‍ക്കും വീഡിയോ ക്യാമറ നല്‍കാനും അവയുടെ പ്രവര്‍ത്തനങ്ങള്‍ റെക്കോര്‍ഡ് ചെയ്യാനും തീരുമാനിച്ചിട്ടുണ്ട്. തിരുവനന്തപുരം സിറ്റിയില്‍ ഇത് പരീക്ഷണാടിസ്ഥാനത്തില്‍ നടത്തുമെന്നും അദ്ദേഹം അറിയിച്ചു.
