തിരുവനന്തപുരം: ഏകജാലക പ്ലസ് വണ് പ്രവേശനത്തിന്റെ ട്രയല് അലോട്ട്മെന്റ് ലിസ്റ്റ് ജൂണ് 24 ന് പ്രസിദ്ധീകരിക്കും. സ്കൂളുകളില് നിന്നും വെരിഫിക്കേഷന് പൂര്ത്തിയാക്കിയ അപേക്ഷകളും അവയുടെ സാധ്യതയുളള ഓപ്ഷനുകളുമാണ് അലോട്ട്മെന്റിനായി പരിഗണിച്ചിട്ടുളളത്.www.hscap.kerala.gov.inഎന്ന വെബ്സൈറ്റില് അപേക്ഷാ നമ്പരും ജനനത്തീയതിയും നല്കി ട്രയല് ലിസ്റ്റ് പരിശോധിക്കാം. ട്രയല് ലിസ്റ്റ് ജൂണ് 25 വരെ പരിശോധിക്കാം.
അപേക്ഷാവിവരങ്ങള് പരിശോധിക്കുന്നതിനും തിരുത്തലുകള് വരുത്തുന്നതിനുമായി ജൂണ് 17 വരെ വിദ്യാര്ത്ഥികള്ക്ക് അവസരം നല്കിയിരുന്നു. ട്രയല് അലോട്ട്മെന്റിനു ശേഷവും ഓപ്ഷനുകള് ഉള്പ്പെടെയുളള അവസാന തിരുത്തലുകള് ആവശ്യമുണ്ടെങ്കില് വരുത്താം. തിരുത്തലിനുളള അപേക്ഷകള് ജൂണ് 25 ന് വൈകുന്നേരം അഞ്ച് മണിക്ക് മുമ്പ് ആദ്യം അപേക്ഷ സമര്പ്പിച്ച സ്കൂളുകളില് സമര്പ്പിക്കണം. തെറ്റായ വിവരങ്ങള് നല്കി ലഭിക്കുന്ന അലോട്ട്മെന്റ് റദ്ദാക്കും. അപേക്ഷയില് തിരുത്തലുകള് വരുത്താനുള്ള അവസാന അവസരമാണിത്. ഇത് സംബന്ധിച്ച് പ്രിന്സിപ്പല്മാര്ക്കുള്ള വിശദമായ നിര്ദ്ദേശങ്ങളും വെബ്സൈറ്റില് ലഭിക്കും. ഇനിയും കൗണ്സിലിങിന് ഹാജരാകാത്ത വിഭിന്നശേഷി വിഭാഗത്തില് ഉള്പ്പെടുന്ന വിദ്യാര്ത്ഥികള് വൈകല്യം തെളിയിക്കുന്ന സര്ട്ടിഫിക്കറ്റ് ജില്ലാതല കൗണ്സലിങ് സമിതിക്ക് മുന്നില് ജൂണ് 25 നകം പരിശോധനയ്ക്ക് ഹാജരാക്കി. റഫറന്സ് നമ്പര് വാങ്ങി അപേക്ഷയിലുള്പ്പെടുത്തണം. ഓണ്ലൈനായി അപേക്ഷ അന്തിമമായി സമര്പ്പിച്ച ശേഷം വെരിഫിക്കേഷനായി അപേക്ഷകള് സമര്പ്പിക്കാത്തവര്ക്ക് അവ ഏതെങ്കിലും സര്ക്കാര് /എയ്ഡഡ് ഹയര്സെക്കന്ഡറി സ്കൂളില് വെരിഫെക്കേഷനായി സമര്പ്പിക്കുന്നതിന് അവസാന അവസരം ജൂണ് 25 ന് വൈകിട്ട് അഞ്ച് മണി വരെയാണ്. അപേക്ഷകര് അനുബന്ധരേഖകള് സഹിതം അപേക്ഷകള് വെരിഫിക്കെഷനായി സമര്പ്പിക്കണം. എല്ലാ അപേക്ഷകരും ട്രയല് ലിസ്റ്റ് പരിശോധിക്കണമെന്നും ഇതിനായി ഹയര്സെക്കന്ഡറി സ്കൂളുകളിലെ ബ്രോഡ്ബാന്റ് ഇന്റര്നെറ്റ് സൗകര്യങ്ങള് ഉപയോഗിക്കാമെന്നും ഹയര്സെക്കന്ഡറി ഡയറക്ടര് അറിയിച്ചു.
Discussion about this post