ന്യൂഡല്ഹി: ആഭ്യന്തരയുദ്ധം രൂക്ഷമായ ഇറാക്കില് ഇന്ത്യ മൂന്നു ക്യാമ്പ് ഓഫീസുകള് തുറന്നു. ഇറാക്കില് നിന്നും മടങ്ങാനാഗ്രഹിക്കുന്ന ഇന്ത്യക്കാരെ തിരികെയെത്തിക്കുന്നതിനുള്ള നടപടികള് വിദേശകാര്യമന്ത്രാലയം ഊര്ജിതമാക്കിയതിന്റെ ഭാഗമായാണു നടപടി. ഗള്ഫ് രാജ്യങ്ങളിലെ ഇന്ത്യന് നയതന്ത്ര പ്രതിനിധികളുടെ യോഗം വിദേശകാര്യമന്ത്രി സുഷമ സ്വരാജ് വിളിച്ചു ചേര്ത്തു. കുവൈറ്റ്, ഖത്തര്,ഒമാന്, സൗദി അറേബ്യ എന്നിവിടങ്ങളിലെ ഇന്ത്യന് പ്രതിനിധികളും ഗള്ഫ് രാജ്യങ്ങളുടെ ഇന്ത്യയിലെ പ്രതിനിധികളും യോഗത്തില് പങ്കെടുക്കുന്നുണ്ട്.
സംഘര്ഷബാധിത പ്രദേശത്തിനു പുറത്തുള്ളവരുള്പ്പെടെ ഇറാക്കില് നിന്ന് മടങ്ങാനാഗ്രഹിക്കുന്ന ഇന്ത്യക്കാര്ക്ക് ആവശ്യമെങ്കില് വിമാനടിക്കറ്റിനുള്ള സാമ്പത്തിക സഹായം നല്കാനും കേന്ദ്ര സര്ക്കാര് തീരുമാനിച്ചു. ഇതിനു പുറമേ നജഫ്, കര്ബല, ബസ്ര എന്നിവിടങ്ങളില് നിയോഗിച്ച എംബസി ഉദ്യോഗസ്ഥര് യാത്രാരേഖകള് തയാറാക്കാനും സഹായിക്കും. പ്രശ്നങ്ങള് നേരിടുന്ന ഇന്ത്യക്കാര് വിവരമറിയിച്ചാല് ഉദ്യോഗസ്ഥര് അവരുടെ തൊഴില്സ്ഥലത്തെത്തി രേഖകളുടെ നടപടിക്രമങ്ങള് പൂര്ത്തിയാക്കി നല്കും. ആവശ്യമെങ്കില് തൊഴില് കരാറുകളിലെ പ്രശ്നങ്ങള് തൊഴിലുടമകളുമായി സംസാരിച്ചു പരിഹരിക്കാനും ഇവര് സഹായിക്കുമെന്നു വിദേശകാര്യ മന്ത്രാലയം അറിയിച്ചു. രക്ഷാ പ്രവര്ത്തനത്തിനുള്ള മാര്ഗങ്ങള്ക്കായി തെരച്ചില് തുടരുകയാണെന്നും അടുത്ത ദിവസം ഗള്ഫ് രാഷ്ട്രസ്ഥാനപതിമാരുമായി നടത്തുന്ന ചര്ച്ച അതിനു കൂടുതല് സഹായകമായേക്കുമെന്നും മന്ത്രാലയ വക്താവ് സയ്യദ് അക്ബറുദ്ദീന് വ്യക്തമാക്കി.
തട്ടിക്കൊണ്ടുപോയ 39 ഇന്ത്യക്കാര് ഇപ്പോഴും തടങ്കലിലാണെന്നും അവര്ക്കു പരിക്കുകളൊന്നുമില്ലെന്നും വിദേശകാര്യ മന്ത്രാലയ വക്താവ് ആവര്ത്തിച്ചു. തിക്രിതില് കുടുങ്ങിക്കിടക്കുന്ന 46 നഴ്സുമാരെ രക്ഷിക്കുന്നതിനുള്ള ശ്രമങ്ങള് തുടരുന്നു. ഇവരുടെ ആശുപത്രിക്കു സമീപം സ്ഫോടനങ്ങളുണ്ടായെന്ന വാര്ത്തകള് ശരിയല്ലെന്നും വിദേശകാര്യ മന്ത്രാലയം വ്യക്തമാക്കി. പ്രശ്നബാധിത മേഖലയില് നൂറോളം ഇന്ത്യക്കാരാണുള്ളത്. മടങ്ങാന് ആഗ്രഹിക്കുന്നവരെ ഉദ്ദേശിച്ചാണു ക്യാമ്പ് ഓഫീസുകള് തുറന്നിരിക്കുന്നത്.
ക്യാമ്പ് ഓഫീസുമായി ബന്ധപ്പെടേണ്ട നമ്പരുകള്: നജഫ് ക്യാമ്പ്- ഉദ്യോഗസ്ഥര്: അബു മാത്തന് ജോര്ജ്(+964 771 6511190), ശ്രീനിവാസ റാവു(+964 771 6511181) രാകേഷ് സിംഗ് (+964 771 6511179) കര്ബല – ഉദ്യോഗസ്ഥര്: അനില് സപ്ര (+964 771 6511180), ജീവന് സിംഗ് (+964 771 6511176, ബസ്ര – ഉദ്യോഗസ്ഥര്: നരസിംഹ മൂര്ത്തി കുപ്പ (+964 771 6511182), ആസിഫ് ഷാ അഹമ്മദ് (+964 771 6511178).
Discussion about this post