തിരുവനന്തപുരം: നാഷണല് ഗെയിംസിന്റെ താളവേഗങ്ങള്ക്ക് ആധുനിക സാങ്കേതിക വിദ്യയുടെ പൂര്ണ്ണത. സുതാര്യതയും കൃത്യതയും കാത്തു സൂക്ഷിച്ച് മത്സര വിശദാംശങ്ങള് തത്സമയം അണുവിടാതെ വിധികര്ത്താക്കള്ക്കും കാണികള്ക്കുമെത്തിക്കാന് ടി.എസ്.ആര് (ടൈമിംഗ് സ്കോറിംഗ് ആന്റ് റിസള്ട്ട്) സംവിധാനമുള്പ്പെടെയുള്ള അത്യാധുനിക സാങ്കേതിക വിദ്യകള് മുപ്പത്തിയഞ്ചാമത് നാഷണല് ഗെയിംസില് ഉപയോഗപ്പെടുത്തും.
ഒളിമ്പികിസ്, ഏഷ്യന് ഗെയിംസ് തുടങ്ങിയ അന്തര് ദേശീയ കായിക മേളകളില് ഉപയോഗിച്ചു വരുന്ന സാങ്കേതിക വിദ്യകള് നാഷണല് ഗെയിംസിലും സമന്വയിപ്പിച്ച് ഗെയിംസിനെ അപൂര്വ്വാനുഭവമാക്കി മാറ്റാനാണ് സംഘാടകര് ഒരുങ്ങുന്നത്. തത്സമയ സ്കോറിംഗുകളും പോയിന്റ് നിലയും പ്രദര്ശിപ്പിക്കുന്നതിനായി മെട്രിക് സംവിധാനങ്ങള് ഉപയോഗിക്കും. കൂടാതെ മത്സരങ്ങളുടെ റീപ്ലേകള്, വീഡിയോ ദൃശ്യങ്ങള് എന്നിവ പ്രദര്ശിപ്പിക്കുന്നതിനായി കൂറ്റന് സ്ക്രീനുകളും ഉണ്ടാകും. ഗെയിംസിലെ ഗ്ലാമര് ഇനങ്ങളിലൊന്നായ അത്ലറ്റിക്സിനായി 5000 ഫ്രെയിമുകള് ഉള്ക്കൊള്ളുന്ന നൂതനമായ ഫോട്ടോ ഫിനിഷ് ക്യാമറ ഉപയോഗിക്കും. ഓട്ടമത്സരങ്ങള്ക്കായി ഇലക്ട്രോണിക്സ് സ്റ്റാര്ട്ടിംഗ് ഗണ് ലഭ്യമാക്കും. ഫൗള് സ്റ്റാര്ട്ടുകള് തത്സസമയം അറിയുന്നതിനായി സെന്സറിംഗ് സാങ്കേതിക വിദ്യയും പ്രയോജനപ്പെടുത്തും. ഷോട്ട്പുട്ട്, ത്രോസ്, ജംപ്സ് തുടങ്ങിയ മത്സരങ്ങളുടെ കൃത്യത അണുവിട തെറ്റാതെ മനസ്സിലാക്കുവാന് ഇലക്ട്രോണിക് ഡിസ്റ്റന്സ് മെഷറിംഗ് (ഇ.ഡി.എം) സംവിധാനമൊരുക്കും. സൈക്ലിംഗ്, അമ്പെയ്ത്ത്, യോട്ടിംഗ് പോലുള്ള മത്സരങ്ങളിലും ഫലങ്ങളുടെ കൃത്യത പൂര്ണ്ണമായും ഉറപ്പു വരുത്തുന്നതിനായി ലഭ്യമായതില് മികച്ച സാങ്കേതിക വിദ്യകള് പ്രയോജനപ്പെടുത്തും. അക്വാട്ടിക്സിന്റെ സ്കോറിംഗ്, ടൈമിംഗ് എന്നിവ തത്സമയം മിഴിവോടെ പ്രദര്ശിപ്പിക്കുന്നതിനായി എല്.ഇ.ഡി മാട്രിക്സ് ഡിസ്പ്ളേ സംവിധാനമാണ് ഒരുക്കുന്നത്.
ഏകദേശം 25.7 സെന്റീമീറ്റര്(10 ഇഞ്ച്) വലിപ്പത്തില് തയ്യാറാകുന്ന ഈ സംവിധാനം ചുവപ്പ്, പച്ച, നീല തുടങ്ങിയ നിറഭേദങ്ങളില് തയ്യാറാകും. ഫൗള് സ്റ്റാര്ട്ടുകളും ഫിനിഷിംഗും വ്യക്തമാകുവാന് അത്യാധുനിക സങ്കേതങ്ങള് സഹായകമാകും. ബോക്സിംഗ്, തായ്ക്വോന്ഡോ, ഫെന്സിംഗ്, റെസ്ലിംഗ് മുതലായ മത്സരങ്ങളിലെ ‘കൈയ്യാങ്കളികള്’ കയ്യോടെ പിടിക്കുന്നതിന് തത്സമയ റീപ്ലേ സംവിധാനമുണ്ടാകും. ഓരോ പഞ്ചുകളും വ്യക്തമായി നിരീക്ഷിക്കുന്നതിനും പ്രധാന ഭാഗങ്ങള് പ്രേക്ഷകരിലേക്ക് തത്സമയം എത്തിക്കുന്നതിനും വേദികളില് കൂറ്റന് സ്ക്രീനുകള് അവതരിപ്പിക്കും. ടെന്നീസ്, ബാസ്ക്കറ്റ് ബോള്, ഹോക്കി, ബാഡ്മിന്റണ്, വോളിബോള്, ഫുട്ബോള് തുടങ്ങിയ ജനപ്രീതിയാര്ജ്ജിച്ച മത്സരങ്ങള് നടക്കുന്ന വേദികളിലെല്ലാം എല്.സി.ഡി ടിവികള്, ഇലക്ട്രോണിക് സ്കോര് ബോര്ഡുകള് എന്നിവയും സജ്ജീകരിക്കും.
Discussion about this post