ജഗദ്ഗുരു സ്വാമി സത്യാനന്ദസരസ്വതി ജയന്തി ആഘോഷം

തിരുവനന്തപുരം: വിശ്വവിശ്രുത സംന്യാസിശ്രേഷ്ഠനും പണ്ഡിതാഗ്രണിയും ലോകഹിതകാമിയുമായിരുന്ന പരമപൂജനീയ ജഗദ്ഗുരു സ്വാമിസത്യാനന്ദസരസ്വതി തൃപ്പാദങ്ങളുടെ 79-ാം ജയന്തിആഘോഷം ചേങ്കോട്ടുകോണം ശ്രീരാമദാസ ആശ്രമം, മിഷന്‍ പ്രസ്ഥാനങ്ങളുടെയും വിവിധ ഹൈന്ദവസംഘടനകളുടെയും ആഭിമുഖ്യത്തില്‍ ഭക്തിനിര്‍ഭരമായ ചടങ്ങുകളോടെ വിശ്വശാന്തി ഷോഡശാഹയജ്ഞമായി ആഘോഷിക്കുന്നു.

ജയന്തി ആഘോഷത്തിന്റെ ഭാഗമായി ഇന്നു (ഒക്‌ടോബര്‍ 15ന്) വൈകുന്നേരം 4.30 മുതല്‍ പുത്തരിക്കണ്ടം മൈതാനത്ത് (സ്വാമി സത്യാനന്ദസരസ്വതി നഗര്‍) ഭജനയും 5.30ന് ജയന്തി സമ്മേളനവും (ശ്രീ സത്യാനന്ദഗുരു സമീക്ഷ) നടക്കും. സമ്മേളനത്തിന് ശ്രീരാമദാസ ആശ്രമം അദ്ധ്യക്ഷന്‍ സ്വാമി ബ്രഹ്മപാദാനന്ദസരസ്വതി ദീപപ്രോജ്വലനം നിര്‍വഹിക്കും. ബി.ജെ.പി സംസ്ഥാന പ്രസിഡന്റ് വി. മുരളീധരന്‍ ഉദ്ഘാടനം ചെയ്യും. ഹിന്ദു ഐക്യവേദി സംസ്ഥാന ജനറല്‍ സെക്രട്ടറി ഇ.എസ്. ബിജു മുഖ്യപ്രഭാഷണം നടത്തും. പ്രൊഫ. വട്ടപ്പറമ്പില്‍ ഗോപിനാഥന്‍ നായര്‍, വിവിധ സമുദായ സംഘടനാ നേതാക്കള്‍ തുടങ്ങിയവര്‍ സംസാരിക്കും.

ഒക്‌ടോബര്‍ 16ന് ജയന്തിദിനത്തില്‍ ചേങ്കോട്ടുകോണം ശ്രീനീലകണ്ഠപുരത്തുള്ള ജ്യോതിക്ഷേത്രത്തില്‍ രാവിലെ 3.30ന് നിര്‍മാല്യം, 5.30ന് ആരാധന, അഹോരാത്രരാമായണ പാരായണം, 7.30ന് ലക്ഷാര്‍ച്ചന സമാരംഭം, 8ന് കഞ്ഞിസദ്യ, ഉച്ചയ്ക്ക് 1ന് അമൃതഭോജനം, വൈകുന്നേരം 7ന് ലക്ഷാര്‍ച്ചന സമര്‍പ്പണം, രാത്രി 7.30ന് ഭജന, 8.30ന് ആരാധന എന്നീ ചടങ്ങുകള്‍ നടക്കും. വെളുപ്പിന് (17.10.2014) 3.30ന് സ്വാമി ബ്രഹ്മപാദാനന്ദ സരസ്വതിയുടെ മുഖ്യകാര്‍മികത്വത്തില്‍ ശ്രീരാമപട്ടാഭിഷേകത്തോടെ ജയന്തിദിനാഘോഷപരിപാടികള്‍ സമാപിക്കും.