തിരുവനന്തപുരം: ആന്റിപൈറസി സെല്ലിന്റേയും വര്‍ക്കല പോലീസിന്റെയും നേത്യത്വത്തില്‍ വ്യാജ സി.ഡി.കള്‍ കണ്ടെടുക്കുന്നതിന് നടത്തിയ റെയ്ഡില്‍ ഒരാള്‍ അറസ്റ്റിലായി. വര്‍ക്കല ശിവഗിരി ജംഗ്ഷനില്‍ കട നടത്തി വന്ന ചെറുന്നിയൂര്‍ കല്ലുമല കുന്നില്‍ മോഹനനാണ് അഞ്ഞൂറോളം വ്യാജ സി.ഡികളുമായി അറസ്റ്റിലായത്.
മലയാള ചിത്രങ്ങളായ അവതാരം, മുന്നറിയിപ്പ്, അപ്പോത്തിക്കിരി, മിസ്റ്റര്‍ ഫ്രോഡ്, ഹൗ ഓള്‍ഡ് ആര്‍ യു, ദൃശ്യം, റിംഗ് മാസ്റ്റര്‍, ബാംഗ്ലൂര്‍ ഡെയ്‌സ് എന്നീ ചിത്രങ്ങളുടെ വ്യാജ സി.ഡി.കളാണ് പിടിച്ചെടുത്തത്. ആന്റിപൈറസി സെല്‍ പോലീസ് സൂപ്രണ്ട് ബി.വര്‍ഗീസിന് ലഭിച്ച രഹസ്യ വിവരത്തിന്റെ അടിസ്ഥാനത്തില്‍ ഡെപ്യൂട്ടി പോലീസ് സൂപ്രണ്ട് എസ്.സനല്‍കുമാര്‍, ഇന്‍സ്‌പെക്ടര്‍ പൃഥ്വിരാജ്, എസ്.ഐ. അനൂപ്.ആര്‍ ചന്ദ്രന്‍, എ.എസ്.ഐ മാരായ മണികണ്ഠന്‍, അസീം, സി.പി.ഒ രാജേഷ്, ഷാന്‍ എന്നിവരും വര്‍ക്കല പോലീസ് സ്റ്റേഷനിലെ പോലീസ് ഉദ്യോഗസ്ഥരും ചേര്‍ന്നാണ് പ്രതിയെ അറസ്റ്റ് ചെയ്തത്.
Discussion about this post