തിരുവനന്തപുരം: അഞ്ച് പ്രതിപക്ഷ എം.എല്.എ.മാരെ നിയമസഭയില്നിന്ന് സസ്പെന്ഡ് ചെയ്തു. കെ. കുഞ്ഞഹമ്മദ് മാസ്റ്റര്, ഇ.പി ജയരാജന്, കെ അജിത്, കെ.ടി ജലീല്, വി.ശിവന്കുട്ടി എന്നിവരെയാണ് ബജറ്റ് ദിവസം സ്പീക്കറുടെ ഡയസ്സില് കയറി സംഘര്ഷമുണ്ടാക്കിയതിന് പുറത്താക്കിയത്.
മുഖ്യമന്ത്രി ഉമ്മന്ചാണ്ടിയാണ് ഇതു സംബന്ധിച്ച പ്രമേയം സഭയില് അവതരിപ്പിച്ചത്. സംഭവത്തില് ഉത്തരവാദികളായ സഭാംഗങ്ങള്ക്കെതിരെ വളരെ വിഷമത്തോടെയാണ് നടപടിയെടുക്കുന്നതെന്നും അദ്ദേഹം പറഞ്ഞു. സ്പീക്കറുടെ വേദിയില് ഭരണപക്ഷത്തെ ഒരു എം.എല്.എ. പോലും കയറിയിട്ടില്ലെന്ന് മുഖ്യമന്ത്രി ഓര്മിപ്പിച്ചു. പ്രതിപക്ഷ അംഗങ്ങള് അവരുടെ സീറ്റിനടുത്തെത്തിയാണ് അവരെ ഉപദ്രവിച്ചതെന്നും അദ്ദേഹം പ്രമേയം അവതരിപ്പിച്ചുകൊണ്ട് പറഞ്ഞു.
എന്നാല് ഏകപക്ഷീയമായ ഈ നടപടി അംഗീകരിക്കില്ലെന്ന് വി.എസ് അച്യുതാനന്ദന് വ്യക്തമാക്കി. സഭയില് വനിത എംഎല്എമാരെ അപമാനിച്ചവര്ക്കെതിരെ എന്തുകൊണ്ട് നടപടിയെടുത്തില്ലെന്ന് അദ്ദേഹം ചോദിച്ചു. തുടര്ന്ന് പ്രതിപക്ഷം നടുത്തളത്തിലിറങ്ങി ബഹളം വെച്ചപ്പോള് സഭാനടപടികള് ഇന്നത്തേക്ക് പിരിഞ്ഞതായി സ്പീക്കര് വ്യക്തമാക്കി. ഇനി മാര്ച്ച് 23-നാണ് വോട്ട് ഓണ് അക്കൗണ്ടിനായി വീണ്ടും സഭചേരും.
Discussion about this post