തിരുവനന്തപുരം: കാടിന്റെ സമ്പത്തായ വന വാസികള് നാടിന്റെയും സമ്പത്താണെന്ന് മുഖ്യമന്ത്രി ഉമ്മന്ചാണ്ടി പറഞ്ഞു. കനകക്കുന്ന് കൊട്ടാര വളപ്പില് ആറ് ദിവസം നീണ്ടു നില്ക്കുന്ന കാനന സംഗമം 2015 ന്റെ ഉദ്ഘാടനം നിശാഗന്ധി ഓഡിറ്റോറിയത്തില് നിര്വ്വഹിക്കുകയായിരുന്നു അദ്ദേഹം.
കാടിന്റെ യഥാര്ത്ഥ അവകാശികള് ആദിവാസികള് മാത്രമാണെന്ന തിരിച്ചറിവിലാണ് സര്ക്കാര് പ്രവര്ത്തിക്കുന്നത്. ആദിവാസികളുടെ വിവിധ പ്രശ്നങ്ങള് മുന്നിര്ത്തി 32000 അപേക്ഷകളാണ് സര്ക്കാരിന് ലഭിച്ചത്. ഇതില് 25500 അപേക്ഷകളില് തീര്പ്പാക്കാനായി. 36000 ഏക്കര് സ്ഥലം ആദിവാസികള്ക്ക് ഇതിനകം നല്കി. 7000 അപേക്ഷകളിലാണ് ഇനി തീരുമാനമെടുക്കേണ്ടത്. അക്കാര്യത്തിലും ഏറ്റവും വേഗം നടപടിയെടുക്കുമെന്നും മുഖ്യമന്ത്രി പറഞ്ഞു.
വനവാസികളുടെ വിവിധ പ്രശ്നങ്ങളില് അത്ഭുതകരമായ ഇടപെടല് നടത്താന് സര്ക്കാരിനായെന്ന് ചടങ്ങില് അധ്യക്ഷനായിരുന്ന വനം മന്ത്രി തിരുവഞ്ചൂര് രാധാകൃഷ്ണന് പറഞ്ഞു. ആദിവാസികള് അഭിമുഖീകരിക്കുന്ന അവശേഷിക്കുന്ന പ്രശ്നങ്ങളും പരിഹരിക്കാനാകണം. വനമേഖലയിലെ പ്രശ്നം പൊതുസമൂഹത്തിന്റെ പ്രശ്നമായി മാറണമെന്നും തിരുവഞ്ചൂര് രാധാകൃഷ്ണന് കൂട്ടിച്ചേര്ത്തു. ഊരിനുണര്വ് കാടിനുണര്വ് പദ്ധതിയുടെ ഉദ്ഘാടനം മേയര് കെ.ചന്ദ്രിക നിര്വഹിച്ചു. ഊരുമിത്ര പദ്ധതികളുടെ ഉദ്ഘാടനം കവയത്രി സുഗതകുമാരിയും കാനനസംഗമം പ്രദര്ശന ഉദ്ഘാടനം ജില്ലാ പഞ്ചായത്ത് പ്രസിഡന്റ് അന്സജിതാ റസ്സലും നിര്വഹിച്ചു.
ചീഫ് സെക്രട്ടറി ജിജി തോംസണ്, വനം വന്യജീവി വകുപ്പ് പ്രിന്സിപ്പല് സെക്രട്ടറി മാരപാണ്ഡ്യന്, ഫോറസ്റ്റ് ഫോഴ്സ് മേധാവി ബി.എസ്.കോറി തുടങ്ങിയവര് സംസാരിച്ചു. തുടര്ന്ന് സൂര്യകൃഷ്ണമൂര്ത്തിയും സംഘവും നാട്ടറിവ് നൃത്ത കലാശില്പ്പം അവതരിപ്പിച്ചു.
Discussion about this post