തിരുവനന്തപുരം: കേന്ദ്ര ഭക്ഷ്യസുരക്ഷാ അഥോറിറ്റി പൊതുജന താത്പര്യാര്ഥം മാഗി നൂഡില്സ് രാജ്യവ്യാപകമായി നിരോധിച്ച സാഹചര്യത്തില് കേരളത്തില് നിരോധനം ശക്തമാക്കിയിട്ടുണെ്ടന്ന് ആരോഗ്യമന്ത്രി വി.എസ്. ശിവകുമാര് അറിയിച്ചു. നിരോധിച്ച ഉത്പന്നങ്ങള് 14 ജില്ലകളിലും ഇല്ലെന്ന് ഉറപ്പുവരുത്താന് ഭക്ഷ്യസുരക്ഷാ കമ്മീഷണര്ക്കു നിര്ദേശം നല്കിയിട്ടുണെ്ടന്നും അദ്ദേഹം പറഞ്ഞു.
സംസ്ഥാന വിപണിയില്നിന്ന് ഇതിനകം 90 ശതമാനത്തിലധികം മാഗി നൂഡില്സ് ഉത്പന്നങ്ങളും നീക്കംചെയ്തിട്ടുണ്ട്. നിരോധിച്ച ഉത്പന്നങ്ങള് കൈവശം വയ്ക്കുന്നതും കച്ചവടത്തിനായി കൈമാറ്റം ചെയ്യുന്നതും വില്ക്കുന്നതും കുറ്റകരമാണ്. ഇത്തരം സംഭവങ്ങള് ശ്രദ്ധയില്പ്പെട്ടാല് അതതു ജില്ലകളിലെ അസിസ്റ്റന്റ് ഫുഡ് സേഫ്റ്റി കമ്മീഷണര്മാരെ നേരിട്ടോ 1800 4251125 എന്ന ടോള് ഫ്രീ നമ്പരിലോ വിവരം അറിയിക്കണം.
ഈ വിഷയത്തില് സംസ്ഥാനത്തു നിലവിലുള്ള സാഹചര്യം വിലയിരുത്തുന്നതിനും നടപടികള് ഏകോപിപ്പിക്കുന്നതിനുമായുള്ള ഉദ്യോഗസ്ഥതല യോഗം ഇന്നു തിരുവനന്തപുരത്തു വിളിച്ചു ചേര്ത്തിട്ടുണെ്ടന്നും മന്ത്രി അറിയിച്ചു. ഇറക്കുമതി ചെയ്തവയുള്പ്പെടെ, കേരള വിപണിയില് ലഭ്യമായ എല്ലാ ബ്രാന്ഡഡ് നൂഡില്സുകളും ഭക്ഷ്യസുരക്ഷാ വകുപ്പ് പരിശോധനയ്ക്കു വിധേയമാക്കുന്നുണ്ട്. ഫുഡ് സേഫ്റ്റി ഓഫീസര്മാര് ജില്ലകളില്നിന്നു ശേഖരിച്ച മാഗി നൂഡില്സ് സാമ്പിളുകളുടെ രണ്ടാം ഘട്ട പരിശോധനകള് പുരോഗമിക്കുകയാണ്. ഫലം ലഭ്യമാക്കുന്ന മുറയ്ക്കു കേന്ദ്രസര്ക്കാരിനു റിപ്പോര്ട്ട് നല്കുമെന്നും മന്ത്രി അറിയിച്ചു.
