തിരുവനന്തപുരം: കീടനാശിനികളുടെ അംശം അനുവദനീയമായ അളവില്‍ കൂടുതലുള്ള പച്ചക്കറികള്‍ അന്യസംസ്ഥാനങ്ങളില്‍നിന്ന് കൊണ്ടുവരുന്നതു തടയാന്‍ അവയുടെ സ്രോതസുകളും മാര്‍ക്കറ്റുകളും കേന്ദ്രീകരിച്ച് നിരോധനം ഏര്‍പ്പെടുത്തുമെന്ന് ആരോഗ്യമന്ത്രി വി.എസ്. ശിവകുമാര്‍ അറിയിച്ചു. പച്ചക്കറികളുടെ സ്രോതസ്സും മാര്‍ക്കറ്റും വെളിപ്പെടുത്തുന്ന വാഹനങ്ങള്‍ മാത്രമേ, ചെക്ക്‌പോസ്റ്റുകളില്‍നിന്നും സംസ്ഥാനത്തേക്ക് കടത്തിവിടുകയുള്ളുവെന്ന് മന്ത്രി പറഞ്ഞു. ഇതുസംബന്ധിച്ച്, ഭക്ഷ്യസിവില്‍സപ്ലൈസ് വകുപ്പ് മന്ത്രി അനൂപ് ജേക്കബിന്റെ സാന്നിധ്യത്തില്‍ വിളിച്ചുചേര്‍ത്ത യോഗത്തിനുശേഷമാണ് അദ്ദേഹം ഇക്കാര്യം അറിയിച്ചത്.
കേരളത്തിലേക്ക് കൊണ്ടുവരുന്ന പച്ചക്കറികള്‍ വിളയിക്കുന്ന കൃഷിയിടങ്ങള്‍ സന്ദര്‍ശിച്ച്, സര്‍ക്കാര്‍ നിയോഗിച്ച ഉദ്യോഗസ്ഥസംഘം സമര്‍പ്പിച്ച റിപ്പോര്‍ട്ടിന്റെ അടിസ്ഥാനത്തില്‍, മുഖ്യമന്ത്രിയുടെ സാന്നിധ്യത്തില്‍ ബന്ധപ്പെട്ട വകുപ്പുകളിലെ മന്ത്രിമാരെ പങ്കെടുപ്പിച്ചുകൊണ്ട് യോഗം വിളിച്ചുകൂട്ടുമെന്നും വി.എസ്. ശിവകുമാര്‍ പറഞ്ഞു. അമിത കീടനാശിനിപ്രയോഗത്തെത്തുടര്‍ന്ന് അന്യസംസ്ഥാന പച്ചക്കറികള്‍ക്ക് നിയന്ത്രണം ഏര്‍പ്പെടുത്തുന്നതിനോടനുബന്ധിച്ച് സംസ്ഥാനത്തെ മുഴുവന്‍ പച്ചക്കറി വ്യാപാരികള്‍ക്കും ലൈസന്‍സ് അല്ലെങ്കില്‍ രജിസ്‌ട്രേഷന്‍ നിര്‍ബന്ധമാക്കി.
അന്യസംസ്ഥാനങ്ങളില്‍നിന്നുള്ള പഴങ്ങള്‍ വില്‍ക്കുന്നവര്‍ക്കും ഇത് ബാധകമാണ്. ഒരുമാസത്തെ സമയമാണ് അനുവദിച്ചിട്ടുള്ളത്. മറ്റു സംസ്ഥാനങ്ങളില്‍നിന്നും പച്ചക്കറികളും പഴങ്ങളും കൊണ്ടുവരുന്ന എല്ലാത്തരം വാഹനങ്ങള്‍ക്കും, ഭക്ഷ്യസുരക്ഷാഗുണനിലവാരനിയമപ്രകാരമുള്ള രജിസ്‌ട്രേഷന്‍ നിര്‍ബന്ധമാക്കിയിട്ടുണ്ട്. ജൂലൈ പതിനഞ്ചിനകം ഇത് കരസ്ഥമാക്കണം. സംസ്ഥാനത്തെ ഭക്ഷ്യസുരക്ഷാ ജില്ലാ ഓഫീസുകളില്‍ ജൂണ്‍ 15 മുതല്‍ സംഘടിപ്പിക്കുന്ന ലൈസന്‍സ് – രജിസ്‌ട്രേഷന്‍ മേളകള്‍, പഴം-പച്ചക്കറി മേഖലയിലെ വ്യാപാരികള്‍ തീര്‍ച്ചയായും പ്രയോജനപ്പെടുത്തണമെന്ന് യോഗത്തിലറിയിച്ചു. ആരോഗ്യവകുപ്പ് സെക്രട്ടറി ഡോ. കെ. ഇളങ്കോവന്‍, ഭക്ഷ്യസിവില്‍സപ്ലൈസ് വകുപ്പ് സെക്രട്ടറി ജി. കമലവര്‍ധന റാവു, ഫുഡ്‌സേഫ്റ്റി ജോയിന്റ് കമ്മീഷണര്‍ കെ. അനില്‍കുമാര്‍, എന്‍ഫോഴ്‌സ്‌മെന്റ് വിഭാഗം ജോയിന്റ് കമ്മീഷണര്‍ ഡി. അഷറഫ്, അസിസ്റ്റന്റ് ഫുഡ് സേഫ്റ്റി കമ്മീഷണര്‍ ഡി. ശിവകുമാര്‍ തുടങ്ങിയവര്‍ പങ്കെടുത്തു.
Discussion about this post