തിരുവനന്തപുരം: 18 വയസ്സിനു താഴെയുള്ളവര് 50 സി.സി. യില് കൂടുതല് എന്ജിന് കപ്പാസിറ്റിയുള്ള ഇരുചക്ര വാഹനങ്ങള് ഓടിച്ചാല് മോട്ടോര് വാഹന നിയമത്തിലെ സെക്ഷന് 180,181 വകുപ്പുകള് പ്രകാരം കര്ശന നടപടി കൈക്കൊള്ളണമെന്ന് സംസ്ഥാന പോലീസ് മേധാവി നിര്ദ്ദേശിച്ചു.
കേരളത്തില് നടക്കുന്ന വാഹന അപകടങ്ങളില് ഏറ്റവും കൂടുതല് ഉള്പ്പെടുന്നത് ഇരുചക്ര വാഹനങ്ങളാണ്. ഈയിടെയായി 18 വയസ്സിനു താഴെയുള്ള ചെറുപ്പക്കാര് ഇരുചക്ര വാഹനങ്ങള് അതിവേഗത്തിലും അലക്ഷ്യമായും അപകടകരമായും ഓടിക്കുന്നതായി നിരവധി പരാതികള് വരുന്ന സാഹചര്യത്തിലാണ് ഈ നിര്ദ്ദേശം. കേന്ദ്ര മോട്ടോര് വാഹന നിയമം 1988 സെക്ഷന് 4 പ്രകാരം വാഹനം ഓടിക്കുവാന് അനുവദനീയമായ കുറഞ്ഞ പ്രായം നിജപ്പെടുത്തിയിട്ടുണ്ട്. ഇതനുസരിച്ച് 50 സി.സി. യില് കൂടുതല് എന്ജിന് കപ്പാസിറ്റിയില്ലാത്ത മോട്ടോര് സൈക്കിള് 16 വയസ് തികഞ്ഞ വ്യക്തികള്ക്ക് ഓടിക്കാവുന്നതാണ്. എന്നാല് 50 സി.സി. എന്ജിന് കപ്പാസിറ്റിയില് കൂടുതലുള്ള ഇരുചക്ര വാഹനങ്ങള് 18 വയസിനു താഴെ പ്രായമുള്ളവര്ക്ക് ഓടിക്കാന് നിയമം അനുവദിക്കുന്നില്ല. ഇത്തരം കേസുകള് പിഴ ചുമത്തി തീര്പ്പാക്കുന്നതിനു പകരം വാഹന ഉടമക്കെതിരെ സെക്ഷന് 180,181 എന്നീ ഗതാഗത നിയമ വകുപ്പുകള് പ്രകാരമുള്ള നടപടികള്ക്കായി കോടതികളിലേക്ക് നല്കണമെന്നും സംസ്ഥാന പോലീസ് മേധാവി നിര്ദേശിച്ചു.
Discussion about this post