പത്തനംതിട്ട: ജില്ലാ ഭരണകൂടത്തിന്റെ മിഷന് ഗ്രീന് ശബരിമല പദ്ധതിയുടെ ഭാഗമായി ശബരിമലയും പൂങ്കാവനവും പമ്പയും മാലിന്യമുക്തമായി സംരക്ഷിക്കുന്നതു സംബന്ധിച്ച് അയ്യപ്പന്മാര്ക്ക് ബോധവത്കരണം നല്കുന്നതിന് ജില്ലാ ശുചിത്വമിഷന് തയാറാക്കിയ ഹ്രസ്വചിത്രത്തിന്റെയും കാനറ ബാങ്ക് സൗജന്യമായി നല്കുന്ന ഒരു ലക്ഷം തുണി സഞ്ചികളുടെ വിതരണത്തിന്റെയും ഉദ്ഘാടനം ഡിസം.16ന് ഉച്ചകഴിഞ്ഞ് മൂന്നിന് പമ്പ രാമമൂര്ത്തി മണ്ഡപത്തില് തിരുവിതാംകൂര് ദേവസ്വം ബോര്ഡ് പ്രസിഡന്റ് പ്രയാര് ഗോപാലകൃഷ്ണന് നിര്വഹിക്കും.
കാനറ ബാങ്ക് സ്പോണ്സര് ചെയ്തിരിക്കുന്ന തുണി സഞ്ചികള് അപ്പവും അരവണയും കൂടുതലായി വാങ്ങുന്ന തീര്ഥാടകര്ക്ക് ദേവസ്വം കൗണ്ടറിലൂടെ സൗജന്യമായി വിതരണം ചെയ്യും. പമ്പയിലേക്ക് തുണി വലിച്ചെറിയരുത്, പ്ലാസ്റ്റിക് മാലിന്യങ്ങള് ഒഴിവാക്കണം തുടങ്ങിയ സന്ദേശങ്ങള് ഉള്പ്പെടുത്തിയാണ് ഹ്രസ്വചിത്രം നിര്മിച്ചിരിക്കുന്നത്. ഹ്രസ്വചിത്രം അടങ്ങുന്ന സിഡി തീര്ഥാടകര് എത്തുന്ന വീഡിയോ കോച്ചുകളിലെ ഗുരുസ്വാമിമാര്ക്ക് സൗജന്യമായി വിതരണം ചെയ്യും. മിഷന് ഗ്രീന് ശബരിമല പദ്ധതിയുടെ ഭാഗമായി സ്ഥാപിച്ചിട്ടുള്ള വീഡിയോ വാളിലും ഹ്രസ്വചിത്രം പ്രദര്ശിപ്പിക്കും.
ജില്ലാ പഞ്ചായത്ത് പ്രസിഡന്റ് അന്നപൂര്ണാദേവി അധ്യക്ഷത വഹിക്കുന്ന ചടങ്ങില് ജില്ലാ കളക്ടര് എസ്. ഹരികിഷോര്, ദേവസ്വം ബോര്ഡ് അംഗങ്ങളായ അജയ് തറയില്, പി.കെ. കുമാരന്, കാനറ ബാങ്ക് ഡെപ്യൂട്ടി ജനറല് മാനേജര് ഡോ.ടി.വി. ദുരൈ പാണ്ടി, സീനിയര് മാനേജര് കൃഷ്ണകുമാര്, മാര്ക്കറ്റിംഗ് ഓഫീസര് ബിജേഷ്, ജില്ലാ ശുചിത്വമിഷന് കോ-ഓര്ഡിനേറ്റര് ഇ.കെ. സുധാകരന്, അസിസ്റ്റന്റ് കോ-ഓര്ഡിനേറ്റര് പി.എന്. മധുസൂദനന്, ഹ്രസ്വചിത്രത്തിന്റെ സംവിധായകന് ബിനില് കൊറ്റക്കാട്ട് എന്നിവര് പങ്കെടുക്കും.
Discussion about this post