തിരുവനന്തപുരം: പമ്പ മുതല് സന്നിധാനം വരെയുള്ള ശരണപാതയിലെ അടിയന്തിര വൈദ്യസഹായ കേന്ദ്രങ്ങള് (എമര്ജന്സി മെഡിക്കല് സെന്ററുകള്) അയ്യപ്പന്മാര്ക്ക് കൈത്താങ്ങാവുന്നു. മലകയറുമ്പോള് തീര്ഥാടകര്ക്കുണ്ടാകുന്ന ഹൃദയാഘാതമടക്കമുള്ള ആരോഗ്യപരമായ ബുദ്ധിമുട്ടുകള്ക്ക് ഉടനടി വൈദ്യസഹായം ലഭ്യമാക്കുകയും വിലപ്പെട്ട ജീവന് രക്ഷിക്കുകയും ചെയ്യുകയെന്ന ലക്ഷ്യത്തിലാണ് സേഫ് ശബരിമല പദ്ധതിയുടെ ഭാഗമായി ജില്ലാ ഭരണകൂടത്തിന്റെ നേതൃത്വത്തില് ആരോഗ്യവകുപ്പ്, അയ്യപ്പസേവാസംഘം, ബിഎസ്എന്എല്, ദേവസ്വം ബോര്ഡ്, വനം വകുപ്പ് എന്നിവയുമായി സഹകരിച്ച് പമ്പ മുതല് സന്നിധാനം വരെ 24 അടിയന്തിര വൈദ്യസഹായ കേന്ദ്രങ്ങള് തുറന്നിട്ടുള്ളത്.
ഇതുവരെ 36,327അയ്യപ്പന്മാര് അടിയന്തിര വൈദ്യസഹായ കേന്ദ്രങ്ങളുടെ സേവനം ഉപയോഗപ്പെടുത്തി. പരിശീലനം ലഭിച്ച നഴ്സിംഗ് വിദ്യാര്ഥികളും അയ്യപ്പസേവാ സംഘത്തിന്റെ സന്നദ്ധ പ്രവര്ത്തകരുമാണ് അടിയന്തിര വൈദ്യസഹായ കേന്ദ്രത്തില് അയ്യപ്പന്മാര്ക്ക് പ്രഥമശുശ്രൂഷ നല്കുന്നത്. ഓക്സിജന് അടക്കം ജീവന് രക്ഷിക്കുന്നതിനാവശ്യമായ എല്ലാ സജ്ജീകരണങ്ങളും സ്ട്രച്ചറും ഇവിടെ ഒരുക്കിയിട്ടുണ്ട്. അടിയന്തിര വൈദ്യസഹായ കേന്ദ്രങ്ങളുമായി 04735-203232 എന്ന ഹെല്പ്പ്ലൈന് നമ്പരില് ബന്ധപ്പെടാം. പമ്പ ഗവണ്മെന്റ് ആശുപത്രി കേന്ദ്രീകരിച്ച് പ്രവര്ത്തിക്കുന്ന ഈ ഹെല്പ്പ്ലൈനില് നിന്നും ആറു ഭാഷകളില് തീര്ഥാടകര്ക്ക് ഉടനടി സേവനം ലഭിക്കും. സന്നിധാനം, അപ്പാച്ചിമേട്, ചരല്മേട്, നീലിമല, പമ്പ എന്നിവിടങ്ങളിലെ ആശുപത്രികളും 24 അടിയന്തിര വൈദ്യസഹായ കേന്ദ്രങ്ങളുമായും ബന്ധിപ്പിച്ചാണ് ഹെല്പ്പ്ലൈന് പ്രവര്ത്തിക്കുന്നത്.
ശരണപാതയില് വൈദ്യസഹായം ആവശ്യമുണ്ടെന്ന വിവരം ലഭിച്ചു കഴിഞ്ഞാല് അയ്യപ്പസേവാ സംഘത്തിന്റെ സന്നദ്ധ പ്രവര്ത്തകര് സ്ട്രച്ചറുമായി എത്തി ഉടന് തന്നെ തീര്ഥാടകനെ അടുത്തുള്ള അടിയന്തിര വൈദ്യസഹായ കേന്ദ്രത്തിലെത്തിക്കുകയും ജീവന്രക്ഷാ നടപടികള് കൈക്കൊള്ളുകയും ചെയ്യും. തുടര്ന്ന് അടുത്തുള്ള ആശുപത്രിയിലേക്കും മാറ്റും.
Discussion about this post