ശിവഗിരി: ശ്രീനാരായണ ഗുരുവിന്റെ ദര്ശനങ്ങള്ക്കും ആശയങ്ങള്ക്കും അങ്ങേയറ്റം പ്രസക്തിയുള്ള കാലമാണിതെന്ന് കോണ്ഗ്രസ് അധ്യക്ഷ സോണിയ ഗാന്ധി. 83-ാമത് ശിവഗിരി തീര്ഥാടന സമ്മേളനം ഉദ്ഘാടനം ചെയ്തു സംസാരിക്കുകയായിരുന്നു സോണിയ.
ഇന്ത്യയിലെ ജനങ്ങളെ വിവിധ തട്ടിലാക്കാന് വര്ഗീയശക്തികള് ശ്രമം നടത്തുന്നതായി അവര് പറഞ്ഞു. രാഷ്ട്രീയ ലക്ഷ്യങ്ങള്ക്കായി മഹത്തായ തത്വങ്ങള് ബലികഴിക്കപ്പെടരുതെന്നും സോണിയ പറഞ്ഞു.
എല്ലാ മതങ്ങളുടെയും നല്ല കാര്യങ്ങള് ഉള്ക്കൊണ്ടതാണ് ഗുരുദര്ശനം. ജാതിയുടെ പേരില് മനുഷ്യരെ ഭിന്നിപ്പിക്കാനുള്ള ശ്രമങ്ങള് നാം ഗുരുദര്ശനങ്ങള് കൊണ്ടു നേരിടണമെന്നും മതസൗഹാര്ദത്തിനു കേരളം എന്നും മാതൃകയായി തുടരട്ടെയെന്നും സോണിയ ആശംസിച്ചു. മലയാളത്തില് പുതുവര്ഷ ആശംസകള് നേര്ന്നാണ് സോണിയ പ്രസംഗം അവസാനിപ്പിച്ചത്.
മനുഷ്യനെ ഭിന്നിപ്പിക്കാനല്ല ഒന്നിപ്പിക്കാനാണ് ഗുരു ശ്രമിച്ചതെന്ന് ചടങ്ങില് സംസാരിച്ച മുഖ്യമന്ത്രി ഉമ്മന് ചാണ്ടി പറഞ്ഞു. ജാതിമത ചിന്തകള്ക്ക് അതീതമായി എല്ലാവരും ഒന്നിച്ചു നില്ക്കണമെന്ന ആശയത്തിനു വളരെ പ്രസക്തിയുള്ള കാലമാണിത്. ഗുരുവിന്റെ ആശയങ്ങള് ചിലര് രാഷ്ട്രീയ ലക്ഷ്യങ്ങള്ക്കായി ഉപയോഗിക്കുകയാണെന്നും ഗുരുദേവ ദര്ശനങ്ങള് പാഠ്യപദ്ധതിയില് ഉള്പ്പെടുത്തുന്നത് തുടരുമെന്നും മുഖ്യമന്ത്രി കൂട്ടിച്ചേര്ത്തു.
കെപിസിസി അധ്യക്ഷന് വി.എം.സുധീരന്, സിപിഐ ദേശീയ സെക്രട്ടറി സുധാകര് റെഡ്ഡി, ലുലു ഗ്രൂപ്പ് ചെയര്മാന് എം.എ. യൂസഫലി, എക്സൈസ് മന്ത്രി കെ.ബാബു, യുഎഇ എക്സ്ചേഞ്ച് പ്രസിഡന്റ് സുധീര്കുമാര് ഷെട്ടി, മുന്മന്ത്രി സി.വി. പത്മരാജന്, ജോസ് കെ. മാണി എം.പി, ഗോകുലം ഗോപാലന്, വര്ക്കല കഹാര് എംഎല്എ, എംഇഎസ് പ്രസിഡന്റ് ഡോ. പി.എ. ഫസല് ഗഫൂര്, ഡോ. ബി. അശോക്, സാറാ ജോസഫ് തുടങ്ങിയവര് ചടങ്ങില് പങ്കെടുത്തു. ധര്മ്മസംഘം ട്രസ്റ്റ് മുന് ട്രഷറര് സ്വാമി അമൃതാനന്ദ ഭദ്രദീപപ്രകാശനം നടത്തി. ട്രസ്റ്റ് ജനറല് സെക്രട്ടറി സ്വാമി ഋതംഭരാനന്ദ സ്വാഗതവും സ്വാമി വിശാലാനന്ദ നന്ദിയും പറഞ്ഞു.
