കൊച്ചി: ബംഗളൂരു സ്ഫോടനക്കേസിലെ പ്രതി തടിയന്റവിട നസീറും മുഖ്യസഹായി പി.എ. ഷഹനാസും ഭീകരാക്രമണത്തിന് പദ്ധതിയിട്ടെന്ന് പോലീസ്. ഷഹനാസിന്റെ രഹസ്യകത്തുകള് പരിശോധിച്ചപ്പോഴാണ് പോലീസിന് ഇക്കാര്യം വ്യക്തമായത്. വിദേശത്തുള്ളവരും ഗൂഢാലോചനയില് പങ്കെടുത്തിരുന്നതായി പോലീസ് സംശയിക്കുന്നു. വിദേശ ഭീകരബന്ധം ആരോപിച്ച് ഇരുവര്ക്കുമെതിരെ എറണാകുളം സെന്ട്രല് പോലീസ് കേസ് രജിസ്റ്റര് ചെയ്തിരുന്നു.
ബംഗളൂരു ജയിലില് കഴിഞ്ഞിരുന്ന നസീറിനായി വിദേശ രാജ്യങ്ങളിലേക്ക് ഷഹനാസ് ഇമെയില് സന്ദേശങ്ങള് അയച്ചതായി കണ്ടെത്തിയതിനെ തുടര്ന്നാണ് പോലീസ് കേസ് റജിസ്റ്റര് ചെയ്തത്. ഷഹനാസില് നിന്ന് പിടികൂടിയ കത്തുകള്, മൊബൈല് ഫോണുകള്, ഉപയോഗിച്ചിരുന്ന ഇമെയിലുകള് തുടങ്ങിയവ സൈബര്സെല് പരിശോധിച്ചിരുന്നു. ഇതില് നിന്നാണ് ഷഹനാസിന്റെ ഭീകരബന്ധങ്ങളുടെ ചുരുളഴിയുന്നത്.
കഴിഞ്ഞ നവംബറിലാണ് തടിയന്റവിട നസീറിന്റെ സഹായി എന്നു വിശേഷിപ്പിക്കപ്പെടുന്ന പെരുമ്പാവൂര് അല്ലപ്ര സ്വദേശി ഷഹനാസിനെ എറണാകുളം ടൗണ് റെയില്വേ സ്റ്റേഷന് പരിസരത്തുനിന്നു നോര്ത്ത് പോലീസ് പിടികൂടുന്നത്. എട്ടു കത്തുകളും നസീറിനു കൈമാറാനായി കൊണ്ടുവന്ന 8,000 രൂപയും മൂന്നു മൊബൈല് ഫോണുകളും രണ്ടു സിം കാര്ഡുകളും ഷഹനാസില്നിന്നു പിടിച്ചെടുത്തിരുന്നു.
ബംഗളൂരു സ്ഫോടനക്കേസില് അഭിഭാഷകരുടെ പക്കല് നിന്നു സാക്ഷികളുടെ വിവരങ്ങള് ശേഖരിച്ച് തടിയന്റവിട നസീര് നിര്ദേശിക്കുന്നവര്ക്കു കൈമാറിയതായി ഷഹനാസ് സമ്മതിച്ചിരുന്നു. കേസില് വിചാരണ നേരിടുന്ന മറ്റൊരു പ്രതിയുടെ മകനുമൊത്താണു പലവട്ടം നസീറിനെ ബംഗളൂരു പരപ്പന അഗ്രഹാര ജയിലില് സന്ദര്ശിച്ചതെന്നും ഷഹനാസ് നേരത്തെ മൊഴി നല്കിയിരുന്നു.
