പമ്പ: ശബരിമല വികസനത്തിന്‌ 625 കോടി രൂപയുടെ മാസ്റ്റര് പ്ലാന്‍ തയാറാക്കിയതായി മുഖ്യമന്ത്രി ഉമ്മന്‍ചാണ്ടി പറഞ്ഞു. തിരുവിതാംകൂര്‍ ദേവസ്വം ബോര്‍ഡ്‌ പമ്പയില്‍ സംഘടിപ്പിച്ച പമ്പാ സംഗമം ഉദ്‌ഘാടനം ചെയ്യുകയായിരുന്നു അദ്ദേഹം.
എരുമേലി വികസനത്തിന്‌ 100 കോടി രൂപയുടെ പദ്ധതി തയാറാക്കിയിട്ടുണ്ട്‌. ഈ വര്‍ഷം മാത്രം 65 കോടി രൂപ ശബരിമല വികസനത്തിനായി സര്‍ക്കാര്‍ ചെലവഴിച്ചു. അടുത്ത വര്‍ഷം 40 കോടി രൂപ ചെലവഴിക്കും. ശബരിമലയിലെ അടിസ്ഥാന സൗകര്യം വികസിപ്പിക്കാനാണ്‌ സര്‍ക്കാര്‍ മുന്‍ഗണന നല്‍കുന്നത്‌. ദക്ഷിണേന്ത്യന്‍ സംസ്ഥാനങ്ങളുടെ പങ്കാളിത്തം കൂടി ഉറപ്പാക്കുന്നതോടെ തീര്‍ഥാടകര്‍ക്ക്‌ പരമാവധി സൗകര്യം ഉറപ്പുവരുത്തും. കഴിഞ്ഞ യു.പി.എ സര്‍ക്കാര്‍ സന്നിധാനത്തിനും പമ്പയ്‌ക്കുമിടയില്‍ 13 ഹെക്‌ടര്‍ വനഭൂമി ശബരിമല വികസനത്തിന്‌ വിട്ടുനല്‍കിയിരുന്നു. ക്യൂ കോംപ്ലക്‌സ്‌ അടക്കം നിരവധി സൗകര്യങ്ങള്‍ ഈ വനഭൂമിയില്‍ ഒരുക്കി. നിലയ്‌ക്കലില്‍ വനഭൂമി അനുവദിച്ചതിനു പകരമായി ഇടുക്കി കമ്പക്കല്ലില്‍ വനം വകുപ്പിന്‌ പകരം ഭൂമി സംസ്ഥാന സര്‍ക്കാര്‍ നല്‍കിയിരുന്നു.
കോടിക്കണക്കിനു തീര്‍ഥാടകരാണ്‌ ശബരിമലയിലെത്തുന്നത്‌. ഇതില്‍ വലിയ പങ്ക്‌ ദക്ഷിണേന്ത്യന്‍ സംസ്ഥാനങ്ങളില്‍ നിന്നാണ്‌. ദക്ഷിണേന്ത്യന്‍ സംസ്ഥാനങ്ങളുടെ പിന്തുണയോടെ തീര്‍ഥാടകര്‍ക്ക്‌ കൂടുതല്‍ അടിസ്ഥാന സൗകര്യങ്ങളൊരുക്കാന്‍ സര്‍ക്കാര്‍ പ്രതിജ്ഞാബദ്ധമാണ്‌. ഇതിന്റെ ഭാഗമായാണ്‌ ദക്ഷിണേന്ത്യന്‍ സംസ്ഥാനങ്ങള്‍ക്ക്‌ അഞ്ചേക്കര്‍ വീതം സ്ഥലം നിലയ്‌ക്കലില്‍ നല്‍കാന്‍ തീരുമാനിച്ചത്‌. കര്‍ണാടക, തെലുങ്കാന, തമിഴ്‌നാട്‌ എന്നീ സംസ്ഥാനങ്ങള്‍ ഭൂമി ഏറ്റെടുക്കാന്‍ സന്നദ്ധത അറിയിച്ചുകഴിഞ്ഞു. ആന്ധ്രയും മുന്നോട്ടുവരുമെന്നാണ്‌ പ്രതീക്ഷ. മറ്റു സംസ്ഥാനങ്ങളുടെ ഉദ്യോഗസ്ഥരും ഓഫീസും വന്നുകഴിഞ്ഞാല്‍ ഇതര സംസ്ഥാന തീര്‍ഥാടകര്‍ക്ക്‌ ഗുണകരമാവും. കേരളത്തിനൊപ്പം മറ്റു ദക്ഷിണേന്ത്യന്‍ സംസ്ഥാനങ്ങള്‍ കൂടി ചേരുമ്പോള്‍ മികച്ച സൗകര്യം തീര്‍ഥാടകര്‍ക്ക്‌ ഒരുക്കാനാവുമെന്ന്‌ മുഖ്യമന്ത്രി പറഞ്ഞു.
ചെന്നൈ ദുരിതാശ്വാസ നിധിയിലേക്ക്‌ തിരുവിതാംകൂര്‍ ദേവസ്വം ബോര്‍ഡ്‌ സമാഹരിച്ച 30 ലക്ഷം രൂപയുടെ ചെക്ക്‌ ദേവസ്വം ബോര്‍ഡ്‌ പ്രസിഡന്റ്‌ പ്രയാര്‍ ഗോപാലകൃഷ്‌ണന്‍ തമിഴ്‌നാട്‌ ധനമന്ത്രി ഒ.പനീര്‍ശെല്‍വത്തിന്‌ കൈമാറി. ദേവസ്വം മന്ത്രി വി.എസ് ശിവകുമാര്‍ അധ്യക്ഷത വഹിച്ച സംഗമത്തില്‍ രാജ്യസഭാ ഉപാധ്യക്ഷന്‍ പ്രൊഫ. പി.ജെ കുര്യന്‍ മുഖ്യാതിഥിയായിരുന്നു. ആഭ്യന്തര മന്ത്രി രമേശ്‌ ചെന്നിത്തല മുഖ്യപ്രഭാഷണം നടത്തി. തമിഴ്‌നാട്‌ ധനമന്ത്രി ഒ.പനീര്‍ശെല്‍വം, തെലുങ്കാന ദേവസ്വം മന്ത്രി എ.ഇന്ദ്രകരണ്‍ റെഡ്ഡി, തമിഴ്‌നാട്‌ ഭക്ഷ്യമന്ത്രി ആര്‍.കാമരാജ്‌, സംസ്ഥാന വനം മന്ത്രി തിരുവഞ്ചൂര്‍ രാധാകൃഷ്‌ണന്‍, പൊതുമരാമത്ത്‌ മന്ത്രി വി.കെ ഇബ്രാഹിംകുഞ്ഞ്‌, ആന്റോ ആന്റണി എം.പി, രാജു ഏബ്രഹാം എം.എല്‍.എ, കര്‍ണാടക ദേവസ്വം കമ്മീഷണര്‍ രാഘവേന്ദ്ര ജനു, തിരുവിതാംകൂര്‍ ദേവസ്വം ബോര്‍ഡ്‌ പ്രസിഡന്റ്‌ പ്രയാര്‍ ഗോപാലകൃഷ്‌ണന്‍, അംഗങ്ങളായ പി.കെ കുമാരന്‍, അജയ്‌ തറയില്‍, ദേവസ്വം സെക്രട്ടറി കെ.ആര്‍ ജ്യോതിലാല്‍, എഡിജിപി കെ.പത്മകുമാര്‍, ദേവസ്വം കമ്മീഷണര്‍ സി.പി.രാമരാജ പ്രേമ പ്രസാദ്‌, ദേവസ്വം ചീഫ്‌ എന്‍ജിനിയര്‍ ജി.മുരളീകൃഷ്‌ണന്‍, വി.ശങ്കരന്‍ പോറ്റി, മുന്‍ എം.എല്‍.എ മാലേത്ത്‌ സരളാദേവി, പി.മോഹന്‍രാജ്‌, വെട്ടൂര്‍ ജ്യോതിപ്രസാദ്‌ തുടങ്ങിയവര്‍ സംബന്ധിച്ചു.
Discussion about this post