തൃപ്പൂണിത്തുറ: അന്തരിച്ച സിനിമാതാരം കല്പനയ്ക്കു കലാകേരളത്തിന്റെ അന്ത്യാഞ്ജലി. സിനിമ, സാംസ്കാരിക, സാമൂഹ്യ രംഗങ്ങളിലെ പ്രമുഖരെയും വന് ജനക്കൂട്ടത്തെയും സാക്ഷിയാക്കി തൃപ്പൂണിത്തുറ മുനിസിപ്പല് ശ്മശാനത്തില് കല്പനയുടെ സംസ്കാരം നടന്നു.
തിങ്കളാഴ്ച ഹൈദരാബാദില് അന്തരിച്ച കല്പനയുടെ മൃതദേഹം ചൊവ്വാഴ്ച ഉച്ചയോടെ നെടുമ്പാശേരി വിമാനത്താവളത്തിലെത്തിച്ചു. ബന്ധുക്കളും സിനിമാപ്രവര്ത്തകരും ചേര്ന്നു വിലാപയാത്രയായി മൃതദേഹം ഉച്ചയ്ക്കു 1.45 ഓടെ തൃപ്പൂണിത്തുറ ലായം കൂത്തമ്പലത്തിലെത്തിച്ചു. ഇവിടെ പൊതുദര്ശനത്തിനുവച്ച മൃതദേഹത്തില് സമൂഹത്തിന്റെ നാനാതുറകളിലുള്ളവര് അന്ത്യാഞ്ജലിയര്പ്പിച്ചു.
3.15നു മൃതദേഹം വിലാപയാത്രയായി താമസസ്ഥലമായിരുന്ന അബാദ് ഡാഫോഡില് ഗാര്ഡന്സിലെത്തിച്ചു. ഇവിടെയും നിരവധി പേര് കല്പനയ്ക്ക് ആദരാഞ്ജലിയര്പ്പിക്കാനെത്തി.
വൈകുന്നേരം 5.30നു സഹോദരി കലാരഞ്ജിനിയുടെ മകന് പ്രിന്സ് (അമ്പോറ്റി) തൃപ്പൂണിത്തുറ മുനിസിപ്പല് ശ്മശാനത്തില് ചിതയ്ക്കു തീകൊളുത്തി. ഔദ്യോഗിക ബഹുമതികളോടെയായിരുന്നു സംസ്കാരച്ചടങ്ങുകള്. കല്പനയുടെ സഹോദരിമാരായ കലാരഞ്ജിനി, ഉര്വശി എന്നിവര് സംസ്കാരച്ചടങ്ങുകളില് പങ്കെടുത്തു.
മുഖ്യമന്ത്രി ഉമ്മന് ചാണ്ടി, ആഭ്യന്തരമന്ത്രി രമേശ് ചെന്നിത്തല, മന്ത്രിമാരായ കെ.സി. ജോസഫ്, തിരുവഞ്ചൂര് രാധാകൃഷ്ണന്, സ്പീക്കന് എന്. ശക്തന്, കെ.ബാബു എംഎല്എ, ഹൈബി ഈഡന് എംഎല്എ, ഡെപ്യൂട്ടി സ്പീക്കര് പാലോട് രവി, മുനിസിപ്പല് ചെയര്പേഴ്സണ് ചന്ദ്രികദേവി ഫിലിം ചേംബറിനുവേണ്ടി പി.വി. ഗംഗാധരന്, സിനി എക്സിബിറ്റേഴ്സിനു വേണ്ടി ലിബര്ട്ടി ബഷീര്, താരസംഘടനയായ അമ്മയ്ക്കു വേണ്ടി ഇടവേള ബാബു, ചലച്ചിത്ര അക്കാഡമിക്കു വേണ്ടി ജോഷി മാത്യു എന്നിവര് അന്തിമോപചാരം അര്പ്പിച്ചു.
സിനിമാരംഗത്തുനിന്നു ജനാര്ദനന്, സിദ്ദിഖ്, പൃഥ്വിരാജ്, ഫഹദ് ഫാസില്, കാവ്യാ മാധവന്, രമ്യാനമ്പീശന്, കെപിഎസി ലളിത, ലാലു അലക്സ്, മണിയന്പിള്ള രാജു, ബാബുരാജ്, മാനോജ് കെ. ജയന്, സുരേഷ് കൃഷ്ണ, കുഞ്ചാക്കോ ബോബന്, സായ്കുമാര്, ദുല്ക്കര് സല്മാന്, സംവിധായകന് കമല് തുടങ്ങിവരും അന്ത്യാഞ്ജലിയര്പ്പിക്കാനെത്തിയിരുന്നു.
തെലുങ്കു സിനിമയുടെ ഷൂട്ടിംഗിനായി ഹൈദരാബാദിലെത്തിയതായിരുന്നു കല്പന. സിനിമയുടെ ചിത്രീകരണം പൂര്ത്തിയാക്കി മടങ്ങാനിരിക്കെയാണ് അന്ത്യം സംഭവിച്ചത്. നേരത്തെ ഹൈദരാബാദ് ഫിലിം ചേംബറില് പൊതുദര്ശനത്തിനുവച്ച ഭൗതികശരീരത്തില് ചലച്ചിത്ര പ്രവര്ത്തകരും ഹൈദരാബാദ് മലയാളി അസോസിയേഷന് ഭാരവാഹികളും അന്ത്യാഞ്ജലിയര്പ്പിച്ചു.
Discussion about this post