തിരുവനന്തപുരം: മദ്യപിച്ച് വാഹനമോടിച്ചതായി പരിശോധനയില് തെളിഞ്ഞാല് പിഴ ഈടാക്കുകയും ലൈസന്സ് റദ്ദാക്കുകയും ചെയ്യുന്നതിനൊപ്പം തടവുശിക്ഷ കൂടി നല്കണമെന്ന ജസ്റ്റിസ് കെ.എസ്. രാധാകൃഷ്ണന് ചെയര്മാനായ സുപ്രീം കോടതി റോഡ് സുരക്ഷാ കമ്മിറ്റിയുടെ നിര്ദ്ദേശം കര്ശനമായി നടപ്പാക്കുമെന്ന് റീജിയണല് ട്രാന്സ്പോര്ട്ട് ഓഫീസര് .
മദ്യപിച്ചും മയക്കുമരുന്നുകള് ഉപയോഗിച്ചും വാഹനമോടിക്കുന്നവരില് നിന്ന് പിഴ ഈടാക്കുന്നതും ലൈസന്സ് താത്കാലികമായി റദ്ദുചെയ്യുന്നതും മതിയായ ശിക്ഷയല്ലെന്നാണ് റോഡ് സുരക്ഷാ കമ്മിറ്റിയുടെ വിലയിരുത്തല്. ഇവര്ക്ക് ആറുമാസത്തെ തടവുശിക്ഷയും 2000 രൂപ പിഴയും ചുമത്തുകയും കുറ്റം ആവര്ത്തിച്ചാല് രണ്ടു വര്ഷത്തെ തടവും 3000 രൂപ പിഴയും ഉറപ്പാക്കുകയും മോട്ടോര് വാഹന നിയമം 20-ാം വകുപ്പു പ്രകാരം ആറുമാസം ലൈസന്സ് റദ്ദ് ചെയ്യുകയും വേണം. റോഡ് നിയമങ്ങള് പാലിക്കാതെ ചരക്കുഗതാഗത ഡ്രൈവിങ് നടത്തുന്നവരെ അപകടകരമായി വാഹനമോടിക്കല് പരിധിയില്പ്പെടുത്തി ഇന്ത്യന് ശിക്ഷാ നിയമം 279-ാം വകുപ്പു പ്രകാരമുള്ള പരമാവധി ശിക്ഷ നല്കാന് പോലീസ് ശ്രദ്ധിക്കണമെന്നും കമ്മിറ്റി അഭിപ്രായപ്പെട്ടിരുന്നു. ഈ നിര്ദ്ദേശങ്ങള് സംസ്ഥാനത്ത് കര്ശനമായി നടപ്പാക്കാന് സംസ്ഥാന ട്രാന്സ്പോര്ട്ട് കമ്മീഷണര് റീജിയണല് ട്രാന്സ്പോര്ട്ട് ഓഫീസര്മാര്ക്ക് നിര്ദേശം നല്കിയിട്ടുണ്ട്.
