തിരുവനന്തപുരം: നാടന്‍ പച്ചക്കറി ഇനങ്ങളുടെ കൃഷി വീണ്ടും സംസ്ഥാനത്ത് സജീവമാക്കാനുള്ള നടപടികള്‍ വകുപ്പ് കൈക്കൊള്ളുമെന്ന് കൃഷിമന്ത്രി വി.എസ്. സുനില്‍കുമാര്‍. ഇതിനുപുറമേ, നാടന്‍ നെല്‍വിത്തുകളുടെയും ചെറുധാന്യങ്ങളുടെ കൃഷി വ്യാപകമാക്കാനും നടപടിയുണ്ടാകും.
പണ്ട് ലഭ്യമായിരുന്ന വിവിധതരം വഴുതന, ചീര, കിഴങ്ങുവര്‍ഗങ്ങള്‍ തുടങ്ങിയവ അടുത്തവര്‍ഷം മുതല്‍ കൃഷിവകുപ്പ് തന്നെ ഇക്കോഷോപ്പുകള്‍ വഴി പ്രോത്‌സാഹിപ്പിക്കും. 15 അഗ്രോ പാര്‍ക്കുകള്‍ കേരളത്തില്‍ ആരംഭിക്കും. ഇവിടങ്ങളിലൂടെ അന്താരാഷ്ട്ര നിലവാരമുള്ള മൂല്യവര്‍ധിത ഉത്പന്നങ്ങള്‍ വിപണനം ചെയ്യും. ഓണക്കാലം കഴിഞ്ഞാലുടന്‍ വിപണി ആസൂത്രണത്തോടെയുള്ള ഇടപെടല്‍ വകുപ്പ് നടത്തും. ഇതുവഴി കാര്‍ഷികോല്‍പ്പന്നങ്ങള്‍ വിപണി ആവശ്യകത തിരിച്ചറിഞ്ഞ് ഉത്പാദനം നടത്തുന്നതിന് വഴിയൊരുക്കാനാകും. ഓരോ ജില്ലയിലും ഏതു കൃഷിയാണ് കൂടുതല്‍, ഏതു കൃഷി നടത്താനാകും തുടങ്ങിയവ വ്യക്തമായി ആസൂത്രണം ചെയ്യാന്‍ മാര്‍ഗരേഖ തയാറാക്കും. നിലവില്‍ കൃഷിക്കാര്‍ക്ക് നഷ്ടമുണ്ടാക്കാതെ പരമാവധി ഉത്പന്നങ്ങള്‍ ഹോര്‍ട്ടിക്കോര്‍പ് വഴി ശേഖരിച്ചു വിപണനം നടത്തുന്നുണ്ടെന്നും മന്ത്രി അറിയിച്ചു.
Discussion about this post