തിരുവനന്തപുരം: വിനോദസഞ്ചാരമേഖലയുടെ വികസനത്തിന് സാംസ്കാരികമേഖല വലിയ സംഭാവനകള് നല്കുന്നുണ്ടെന്ന് ഗവര്ണര് പി. സദാശിവം അഭിപ്രായപ്പെട്ടു. കനകക്കുന്നില് ആരംഭിച്ച നിശാഗന്ധി നൃത്തോത്സവം ഉദ്ഘാടനം ചെയ്തും നിശാഗന്ധി പുരസ്കാരം ഭാരതി ശിവജിക്ക് സമ്മാനിച്ചും സംസാരിക്കുകയായിരുന്നു ഗവര്ണര്.
ലോകത്താകമാനമുള്ള വിനോദസഞ്ചാരികള്ക്ക് നൃത്തവും സംഗീതവും പോലുള്ള കലാരൂപങ്ങള് എന്നും ആകര്ഷണമാണ്. അതുകൊണ്ട് നശിച്ചുകൊണ്ടിരിക്കുന്ന ഒട്ടേറെ കലാരൂപങ്ങള്ക്ക് പ്രോത്സാഹനം നല്കാന് വിനോദസഞ്ചാരവുമായി ബന്ധപ്പെട്ട സാംസ്കാരിക പരിപാടികള് കാരണമാകുന്നുണ്ട്. ദേശീയ പ്രാധാന്യമുള്ള നൃത്തോത്സവങ്ങളുടെ പട്ടികയില് നിശാഗന്ധി ഫെസ്റ്റിവലുമുണ്ട്. ഭാരതത്തിലെ ഉന്നതശീര്ഷരായ ശാസ്ത്രീയ നര്ത്തകര് എല്ലാവരുംതന്നെ ഈ വേദിയില് നൃത്തരൂപങ്ങള് അവതരിപ്പിച്ചിട്ടുണ്ട്. ഇന്ത്യയിലെ ഏറ്റവും മികച്ച നര്ത്തകിക്കാണ് ഈവര്ഷം നിശാഗന്ധി പുരസ്കാരം സമ്മാനിക്കുന്നത് എന്നതില് അതിയായ സന്തോഷമുണ്ടെന്ന് അദ്ദേഹം പറഞ്ഞു. േകരളത്തിന്റെ സ്വന്തം കലാരൂപമായ മോഹിനിയാട്ടത്തിന്റെ നവീകരണത്തിന് ഏറെ പ്രയത്നിച്ച കലാകാരിയാണ് ഭാരതി ശിവജി. കലയോടും കലാകാരന്മാരോടും കേരളം കാണിക്കുന്ന ആദരങ്ങള്ക്ക് മികച്ച തെളിവാണീ തെരഞ്ഞെടുപ്പ്. ശാസ്ത്രീയ കലാരൂപങ്ങള്ക്കൊപ്പം നാടന്കലകള്ക്കും കൂടുതല് പ്രോത്സാഹനം നല്കണമെന്നും അദ്ദേഹം കൂട്ടിച്ചേര്ത്തു. അന്തരിച്ച കവി ഒ.എന്.വി കുറുപ്പ് രചിച്ച സ്വാഗതഗാനത്തിനുശേഷം നര്ത്തകിമാര് കൈയിലേന്തിയ ഏഴു വിളക്കുകള് തെളിച്ചാണ് ഗവര്ണര് നൃത്തോല്സവം ഉദ്ഘാടനം ചെയ്തത്.
രാജ്യത്തെ ഏറ്റവും മികച്ച നര്ത്തകരുടെ നിരയാണ് ഏഴുദിവസത്തെ നൃത്തോത്സവത്തിന് തലസ്ഥാനത്ത് എത്തുന്നതെന്ന് ചടങ്ങില് അധ്യക്ഷത വഹിച്ച വിനോദസഞ്ചാരവകുപ്പ് മന്ത്രി കടകംപള്ളി സുരേന്ദ്രന് പറഞ്ഞു. ഇതോടൊപ്പം കേരളത്തിന്റെ അഭിമാന ക്ലാസിക്കല് നൃത്തരൂപങ്ങളായ കഥകളി, കൂത്ത്, കൂടിയാട്ടം എന്നിവയുടെ മേളയും ഇവിടെ അരങ്ങേറുമെന്നും അദ്ദേഹം പറഞ്ഞു.
മോഹിനിയാട്ടത്തിന്റെ ജന്മനാട്ടില് നിന്നുതന്നെ മോഹിനിയാട്ടത്തിന്റെ പേരില് ആദരിക്കപ്പെട്ടതില് അതിയായ സന്തോഷമുണ്ടെന്ന് നിശാഗന്ധി പുരസ്കാരം സ്വീകരിച്ചുകൊണ്ട് ഭാരതി ശിവജി പറഞ്ഞു. മോഹിനിയാട്ടം ലോകമാകെ പ്രചരിപ്പിക്കാന് കഴിയുന്നതെല്ലാം ചെയ്യുമെന്നും അവര് കൂട്ടിച്ചേര്ത്തു.
മേയര് വി.കെ.പ്രശാന്ത്, കൗണ്സിലര് പാളയം രാജന്, വിനോദസഞ്ചാരവകുപ്പ് പ്രിന്സിപ്പല് സെക്രട്ടറി ഡോ. വി. വേണു, അഡീ. ഡയറക്ടര് എം. രഘുദാസന് തുടങ്ങിയവര് സംബന്ധിച്ചു.
Discussion about this post