* തണ്ണീര്ത്തട ദിനാചരണം ഉദ്ഘാടനം ചെയ്തു
തിരുവനന്തപുരം: സംസ്ഥാനത്തെ മൂന്ന് റാംസര് തണ്ണീര്ത്തടങ്ങളായ ശാസ്താംകോട്ട, വേമ്പനാട്, അഷ്ടമുടി എന്നിവയുടെ സംരക്ഷണത്തിന് കേന്ദ്രസഹായം തേടാനുള്ള അടിയന്തര നടപടികള് ഉടന് ഉണ്ടാവുമെന്ന് മുഖ്യമന്ത്രി പിണറായി വിജയന് പറഞ്ഞു. ഇതുസംബന്ധിച്ച് വിശദമായ പ്രൊപ്പോസല് കേന്ദ്രസര്ക്കാരിന് സമര്പ്പിക്കും. തണ്ണീര്ത്തട സംരക്ഷണം ഉറപ്പുവരുത്താന് സര്ക്കാര് പ്രതിജ്ഞാബദ്ധമാണ്. ഇവയുടെ സംരക്ഷണത്തിനുള്ള പ്രായോഗികമായ പദ്ധതിയാണ് ഹരിതകേരളം മിഷന്. സംസ്ഥാനത്തിന്റെ നഷ്ടപ്പെട്ട പച്ചപ്പ് വീണ്ടെടുക്കാനും ജൈവവൈവിധ്യം ഉറപ്പുവരുത്താനും ജലസ്രോതസ്സുകള് സംരക്ഷിക്കാനും ഹരിതകേരളം ലക്ഷ്യമിടുന്നു. പരിസ്ഥിതി കാലാവസ്ഥാ വ്യതിയാന വകുപ്പിന്റെ ആഭിമുഖ്യത്തില് ലോക തണ്ണീര്ത്തട ദിനം സംസ്ഥാനതല ആചരണം വി.ജെ.ടി ഹാളില് ഉദ്ഘാടനം ചെയ്യുകയായിരുന്നു അദ്ദേഹം. തണ്ണീര്ത്തടങ്ങള് നശിപ്പിക്കുന്നതിലൂടെ മനുഷ്യരാശി സ്വന്തം കുഴി തോണ്ടുകയാണെന്ന് മുഖ്യമന്ത്രി പറഞ്ഞു.
ഇരുപതോളം ശുദ്ധജല തടാകങ്ങളും 44 നദികളും ഉണ്ടായിട്ടും സംസ്ഥാനം കടുത്ത ജലദൗര്ലഭ്യം നേരിടുന്നതിനുള്ള കാരണം തണ്ണീര്ത്തടങ്ങളുടെ നാശമാണ്. സൂനാമി ഉള്പ്പെടെയുള്ള പ്രകൃതി ദുരന്തങ്ങള് തടയുന്നതിലും ഇവ വഹിക്കുന്ന പങ്ക് വിലമതിക്കാനാവാത്തതാണ്. തണ്ണീര്ത്തടങ്ങളുടെ സംരക്ഷണത്തിന് പൊതുസമൂഹമാകെ ജാഗ്രത പുലര്ത്തണമെന്നും മുഖ്യമന്ത്രി പറഞ്ഞു.
തണ്ണീര്ത്തടങ്ങള് സംരക്ഷിക്കാന് പ്രായോഗികമായ പദ്ധതികള് ആവിഷ്കരിക്കാനും പ്രയോഗത്തില് വരുത്താനും തയ്യാറാകേണ്ടതുണ്ടെന്ന് അധ്യക്ഷത വഹിച്ച ഫിഷറീസ് മന്ത്രി ജെ.മെഴ്സിക്കുട്ടിയമ്മ പറഞ്ഞു. അവശേഷിക്കുന്ന റാംസര് തണ്ണീര്ത്തടങ്ങളെങ്കിലും സംരക്ഷിക്കാന് കഴിയണം. അഷ്ടമുടിക്കായല് ഉള്പ്പെടെയുള്ളവ ഗുരുതരമായ മലിനീകരണം നേരിടുകയാണെന്നും മന്ത്രി പറഞ്ഞു.
ശാസ്ത്ര സാങ്കേതിക വകുപ്പ് പ്രിന്സിപ്പല് സെക്രട്ടറി ഡോ.സുരേഷ് ദാസ്, പ്രിന്സിപ്പല് വനം ചീഫ് കണ്സര്വേറ്റര് എസ്.സി.ജോഷി, കൗണ്സിലര് അയിഷ ബേക്കര്, പരിസ്ഥിതി കാലാവസ്ഥ വ്യതിയാനവകുപ്പ് ഡയറക്ടര് പത്മ മഹന്തി തുടങ്ങിയവര് സംസാരിച്ചു. ഉദ്ഘാടന ചടങ്ങിനുശേഷം നടന്ന തണ്ണീര്ത്തട സംരക്ഷണം സംബന്ധിച്ച സെമിനാറില് മുഖ്യമന്ത്രിയുടെ ശാസ്ത്ര ഉപദേഷ്ടാവ് ഡോ.എം.സി.ദത്തന്, ആലപ്പുഴ അന്തര്ദേശീയ കായല് കൃഷി ഗവേഷണകേന്ദ്രം ഡയറക്ടര് ഡോ.കെ.ജി.പത്മകുമാര്, സംസ്ഥാന ശാസ്ത്ര സാങ്കേതിക കൗണ്സില് സയന്റിസ്റ്റ് ഡോ.പി.ഹരിനാരായണന് എന്നിവര് വിഷയങ്ങള് അവതരിപ്പിച്ചു.
