കൊച്ചി: നടി ആക്രമിക്കപ്പെട്ട കേസില്‍ അറസ്റ്റിലായ ദിലീപിനെ താരസംഘടനയായ ‘അമ്മ’ പുറത്താക്കി. സംഘടനയുടെ ട്രഷര്‍ സ്ഥാനത്തു നിന്നും പ്രാഥമിക അംഗത്വത്തില്‍ നിന്നുമാണ് ദിലീപിനെ പുറത്താക്കിയത്. തിങ്കളാഴ്ച അറസ്റ്റിലായ ദിലീപിനെ ഇന്ന് 14 ദിവസത്തേയ്ക്ക് റിമാന്‍ഡ് ചെയ്തതിന് ശേഷം നടന്ന താരസംഘടനയുടെ എക്‌സിക്യൂട്ടീവ് യോഗത്തിലാണ് സുപ്രധാന തീരുമാനമുണ്ടായത്. മമ്മൂട്ടിയുടെ കൊച്ചിയിലെ വസതിയില്‍ ചേര്‍ന്ന യോഗത്തില്‍ മോഹന്‍ലാല്‍ അമ്മ സെക്രട്ടറി ഇടവേള ബാബു, നടന്‍മാരായ പൃഥ്വിരാജ്, രമ്യാ നന്പീശന്‍, ആസിഫ് അലി തുടങ്ങിയവര്‍ പങ്കെടുത്തു.
ആക്രമിക്കപ്പെട്ട തങ്ങളുടെ സഹോദരിക്കൊപ്പമാണെന്നും ദിലീപിനെ അമ്മയില്‍ നിന്ന് പുറത്താക്കിയെന്നും യോഗത്തിന് ശേഷം സെക്രട്ടറി ഇടവേള ബാബു വാര്‍ത്താക്കുറിപ്പ് പുറത്തിറക്കി. നടിയെ മോശമായി ചിത്രീകരിച്ച് സംസാരിച്ച സംഘടനയിലെ ചില അംഗങ്ങളുടെ നടപടിയില്‍ കടുത്ത പ്രതിഷേധമുണ്ട്. ഇനി ഇത്തരം തെറ്റുകള്‍ ആവര്‍ത്തിച്ചാല്‍ ശക്തമായ നടപടിയുണ്ടാകുമെന്നും വാര്‍ത്താക്കുറിപ്പില്‍ വ്യക്തമാക്കിയിട്ടുണ്ട്.
കേസില്‍ കൃത്യമായ അന്വേഷണം നടത്തിയ പോലീസ് ഉദ്യോഗസ്ഥരെ അഭിനന്ദിക്കുകയാണ്. നടിക്ക് എല്ലാ നിയമ സഹായവും നല്‍കുമെന്നും താരസംഘടന അറിയിച്ചു.
അടുത്തിടെ നടന്ന വാര്‍ഷിക പൊതുയോഗത്തിന് ശേഷം താരസംഘടന നടത്തിയ വാര്‍ത്താസമ്മേളനത്തില്‍ ദിലീപിനെ പൂര്‍ണമായും സംരക്ഷിക്കുന്ന നിലപാടാണ് സ്വീകരിച്ചിരുന്നത്. ഇതിനെതിരേ രൂക്ഷ വിമര്‍ശനവും പൊതു സമൂഹത്തില്‍ നിന്നും ഉയര്‍ന്നിരുന്നു. പിന്നാലെയാണ് തെളിവുകളോടെ പോലീസ് ദിലീപിനെ കുരുക്കിയത്. ഇതോടെ നിലപാട് മാറ്റാന്‍ അമ്മ നിര്‍ബന്ധിതരാവുകയായിരുന്നു.
രാവിലെ പ്രൊഡ്യൂസേഴ്‌സ് അസോസിയേഷനില്‍ നിന്നും ഫെഫ്കയില്‍ നിന്നും ദിലീപിനെ പുറത്താക്കിയിരുന്നു. പ്രൊഡ്യൂസേഴ്‌സ് അസോസിയേഷന്‍ അടിയന്തര എക്‌സിക്യൂട്ടീവ് യോഗം ചേര്‍ന്നാണ് പുറത്താക്കല്‍ നടപടിയുണ്ടാത്.
Discussion about this post