ജലനിരപ്പ് താഴ്ന്നു: മുല്ലപ്പെരിയാര്‍ അണക്കെട്ടിന്റെ എല്ലാം ഷട്ടറുകളും അടച്ചു

ഇടുക്കി: ജലനിരപ്പ് താഴ്ന്നതിനെ തുടര്‍ന്ന് മുല്ലപ്പെരിയാര്‍ അണക്കെട്ടിന്റെ എല്ലാം ഷട്ടറുകളും തമിഴ്നാട് അടച്ചു. ജലനിരപ്പ് 140 അടിയില്‍ എത്തുകയും അണക്കെട്ടിലേയ്ക്ക് ഒഴുകി എത്തുന്ന അത്ര തന്നെ ജലം പെന്‍സ്റ്റോക്കുകളിലൂടെ തമിഴ്നാട് ഒഴുക്കി കൊണ്ടു പോകുകയും ചെയ്യുന്ന സാഹചര്യത്തിലാണ് എല്ലാം ഷട്ടറുകളും അടയ്ക്കാന്‍ തമിഴ്നാട് തീരുമാനിച്ചത്. നിലവില്‍ 2207 ഘനയടി ജലമാണ് ഡാമിലേയ്ക്ക് ഒഴുകി എത്തുന്നത്. നീരൊഴുക്ക് കുറഞ്ഞതിനെ തുടര്‍ന്ന് ഏഴു ഷട്ടറുകള്‍ ഇന്നലെ അടച്ചിരുന്നു. തുടര്‍ന്ന് രാത്രിയാണ് ബാക്കി അഞ്ചു ഷട്ടറുകളും അടച്ച് ജലനിരപ്പ് ക്രമീകരിച്ചിരിക്കുന്നത്.

അതേ സമയം ഇടുക്കി അണക്കെട്ടിലെ ജലനിരപ്പ് 2401.24 അടിയാണ്. ഡാമിലേയ്ക്കുള്ള നീരൊഴുക്ക് കുറഞ്ഞതോടെ ഷട്ടറുകള്‍ വഴി പുറത്തേയ്ക്ക് ഒഴുക്കുന്ന ജലത്തിന്റെ അളവ് സെക്കന്റില്‍ 4 ലക്ഷം ലിറ്ററാക്കി കെഎസ്.ഇ.ബി കുറച്ചിട്ടുണ്ട്.