തിരുവനന്തപുരം : ശബരിമല വിഷയത്തില് ഭക്തരുടെ പ്രതിഷേധം ശക്തമുകുമ്പോള് കോടതി വിധി എന്തായാലും നടപ്പാക്കുമെന്ന് മുഖ്യമന്ത്രി പത്രസമ്മേളനത്തില് പറഞ്ഞു. വിധി നടപ്പാക്കുമെന്ന് സര്ക്കാര് കോടതിയില് വാക്കുകൊടുത്തിരുന്നു. പിന്നെ പുന: പരിശോധന ഹര്ജിയുടെ ആവശ്യമെന്തെന്നും മുഖ്യമന്ത്രി ചോദിച്ചു. അതേസമയം പുന:പരിശോധന ഹര്ജിയുമായി ആരു പോകുന്നതിലും സര്ക്കാര് തടസമല്ലെന്നും മുഖ്യമന്ത്രി പത്രസമ്മേളനത്തില് വ്യക്തമാക്കി.
വിധിവന്നപ്പോള് തന്നെ കോണ്ഗ്രസ് ദേശീയനേതൃത്വം സ്വാഗതം ചെയ്തിരുന്നു. മുന് മുഖ്യമന്ത്രി ഉമ്മന് ചാണ്ടിയും പ്രതിപക്ഷ നേതാവ് രമേശ് ചെന്നിത്തലയും ആദ്യം വിധിയെ സ്വാഗതം ചെയ്തവരാണ്. പിന്നീടാണ് അതിനെ എതിര്ക്കുന്നത്. ഇത്തരം നിലപാട് ബിജെപിയെ വളര്ത്തുന്നതാണ് കോണ്ഗ്രസ് മനസ്സിലാക്കണം. കോണ്ഗ്രസ് ദേശീയ പ്രസ്ഥാനത്തിന്റെ ഭാഗമായി നടത്തിയ നവോത്ഥാന പ്രവര്ത്തനങ്ങള് മറന്നു പോകരുതെന്നും മുഖ്യമന്ത്രി പറഞ്ഞു.
ബിജെപി ഇരട്ടത്താപ്പാണ് കാണിക്കുന്നതെന്നും മഹാരാഷ്ട്രയിലെ ക്ഷേത്രത്തില് സ്ത്രീ പ്രവേശനം അനുവദിച്ചത് ബിജെപിയാണെന്നും മുഖ്യമന്ത്രി ചൂണ്ടിക്കാട്ടി. ശബരിമലയില് യുവതീ പ്രവേശനം സാദ്ധ്യമായിരുന്നു എന്ന് ചരിത്രത്തില് പറയുന്നുണ്ട്. പരമോന്നത കോടതിയുടെ വിധി നടപ്പാക്കുക സര്ക്കാരിന്റെ തീരുമാനവും ഉത്തരവാദിത്വവുമാണെന്നും പിണറായി പത്രസമ്മേളനത്തില് പറഞ്ഞു.
വിശ്വാസികളുമായി ഏറ്റുമുട്ടല് സര്ക്കാരിന്റെ നയമല്ല. അവര്ക്ക് എല്ലാ സൗകര്യങ്ങളും ഉറപ്പാക്കാന് സര്ക്കാര് പ്രതിജ്ഞാബദ്ധമാണ്. എന്നാല് രാഷ്ട്രീയ പ്രേരിതമായി സംഘര്ഷങ്ങളുണ്ടാക്കാനുള്ള ശ്രമത്തിനു വഴങ്ങാന് തയ്യാറല്ലെന്നും വിധി നടപ്പാക്കാനാണ് സര്ക്കാരിന്റെ തീരുമാനമെന്നും മുഖ്യമന്ത്രി വ്യക്തമാക്കി.
Discussion about this post