ആലപ്പുഴ പട്ടണത്തെ ആധുനിക നഗരം ആക്കും – മന്ത്രി ജി.സുധാകരന്‍

ആലപ്പുഴ: ആലപ്പുഴ നഗരപാത വികസന പദ്ധതി പൂര്‍ത്തിയാകുന്നതോടെ ആലപ്പുഴ പട്ടണം ആധുനിക നഗരമായി മാറുമെന്ന് പൊതുമരാമത്ത് രജിസ്ട്രേഷന്‍ വകുപ്പ് മന്ത്രി ജി. സുധാകരന്‍ പറഞ്ഞു. പട്ടണത്തിലെ 21 റോഡ് നിര്‍മ്മാണ പദ്ധതികള്‍ക്ക് നേതൃത്വം നല്‍കുന്ന കേരള റോഡ് ഫണ്ട് ബോര്‍ഡിന് പഴവീട് ജംഗ്ഷനുസമീപം ആരംഭിച്ച പദ്ധതി കാര്യാലയത്തിന്റെ് ഉദ്ഘാടനം നിര്‍വഹിച്ചു സംസാരിക്കുകയായിരുന്നു മന്ത്രി. എ സി റോഡ് 150 കോടി രൂപയ്ക്ക് ഉയര്‍ത്തി ചെയ്യാനുള്ള പദ്ധതികള്‍ ആവിഷ്‌കരിക്കുകയാണ്. ആലപ്പുഴ നഗരപാത വികസന പദ്ധതി പ്രകാരം നഗരത്തിലെ പിഡബ്ല്യുഡി റോഡുകളും ആധുനിക നിലവാരത്തിലേക്ക് മാറും. മുപ്പാലത്തിന്റെ സ്ഥാനത്ത് 4 പാലങ്ങള്‍ വരും. 700 കോടി രൂപയുടെ ഹബ്ബിന്റെ വിശദമായ പദ്ധതി രേഖ പൂര്‍ത്തിയായിട്ടുണ്ട്. ബജറ്റില്‍ ആലപ്പുഴയ്ക്ക് കാര്യമായൊന്നും ലഭിക്കാതിരുന്ന ഭൂതകാലം മാറ്റി സംസ്ഥാന സര്‍ക്കാര്‍ വലിയ പദ്ധതികള്‍ നഗരത്തില്‍ നടപ്പിലാക്കുകയാണെന്ന് മന്ത്രി പറഞ്ഞു.

ആധുനിക റോഡുകളും മറ്റും നിര്‍മിക്കുമ്പോള്‍ ജനങ്ങളുടെ മനോഭാവവും മാറേണ്ടതുണ്ട്. റോഡ് കയ്യേറിയത് ഒഴിഞ്ഞു കൊടുക്കേണ്ടത് വികസന പ്രവര്‍ത്തനത്തിന് അനിവാര്യമാണെന്നും മന്ത്രി സൂചിപ്പിച്ചു.പട്ടണത്തിലെ റോഡുകളുടെ നിലവിലുള്ള സ്ഥിതി മെച്ചപ്പെടുത്തി അന്താരാഷ്ട്ര നിലവാരത്തിലാക്കണമെന്ന് പൊതുമരാമത്ത് വകുപ്പ് മന്ത്രി ജി.സുധാകരനും ധനകാര്യ വകുപ്പ് മന്ത്രി ഡോ. ടി.എം. തോമസ് ഐസക്കും തീരുമാനിക്കുകയും അതിനനുസരിച്ച് വിശദമായ പ്രോജക്ട് റിപ്പോര്‍ട്ട് തയ്യാറാക്കുന്നതിന് കേരള റോഡ് ഫണ്ട് ബോര്‍ഡിനെ ചുമതലപ്പെടുത്തുകയും ചെയ്തിരുന്നു. അതിന്റെ അടിസ്ഥാനത്തില്‍ ആലപ്പുഴ പട്ടണത്തിലെ പൊതുമരാമത്ത് വകുപ്പിന്റെ 21 പ്രധാനപ്പെട്ട റോഡുകളുടെ അഭിവൃദ്ധിപ്പെടുത്തല്‍ പൊതു സ്വകാര്യ പങ്കാളിത്തത്തോടു കൂടി നടപ്പിലാക്കുന്നതിനുള്ള പദ്ധതിക്ക് 288 കോടി രൂപയുടെ ഭരണാനുമതി ലഭിച്ചിട്ടുണ്ട്. പൂനെ ആസ്ഥാനമായുള്ള രോഹന്‍ രാജ്ദീപ് ടോള്‍വെയ് ലിമിറ്റഡ് എന്ന കമ്പനിയാണ് കരാര്‍ ഏറ്റെടുത്തിരിക്കുന്നത്. രണ്ടു വര്‍ഷം കൊണ്ട് പണി പൂര്‍ത്തീകരിക്കുകയും 13 വര്‍ഷത്തെ പരിപാലന വ്യവസ്ഥയോട് കൂടിയുമാണ് കരാര്‍ നല്‍കിയിരിക്കുന്നത്. കേരള റോഡ് ഫണ്ട് ബോര്‍ഡ ആണ് ടെണ്ടര്‍ നടപടികള്‍ പൂര്‍ത്തീകരിച്ച് കരാര്‍ നല്‍കിയത്. യോഗത്തില്‍ നഗരസഭാ ചെയര്‍മാന്‍ തോമസ് ജോസഫ് അധ്യക്ഷത വഹിച്ചു. മത്സ്യഫെഡ് ചെയര്‍മാന്‍ പി.പി.ചിത്തരഞ്ജന്‍, കൗണ്‍സിലര്‍മാരായ ഡി.ലക്ഷ്മണന്‍,ഷീലമോഹന്‍, വി.എന്‍.വിജയകുമാര്‍, ജ്യോതിമോള്‍, പ്രസന്ന ചിത്രകുമാര്‍, സജേഷ് ചക്കുപറമ്പില്‍, ചീഫ് എക്സിക്യൂട്ടീവ് ഓഫീസര്‍ ദീപ്തി ഭാനു, പ്രോജക്ട് മാനേജര്‍ കെ.ദിവാകരന്‍ എന്നിവര്‍ പങ്കെടുത്തു.