തിരുവനന്തപുരം: സര്ക്കാര് ജീവനക്കാരുടെ ക്വാര്ട്ടേഴ്സുകള്ക്കായി പുതിയ നയം രൂപീകരിക്കുന്നത് പരിഗണനയിലാണെന്ന് പൊതുമരാമത്ത്, രജിസ്ട്രേഷന് മന്ത്രി ജി. സുധാകരന് പറഞ്ഞു. ധനകാര്യ, പൊതുഭരണ വകുപ്പുകളും ജീവനക്കാരുടെ സംഘടനകളുമായും ആലോചിച്ചാവും നയം രൂപീകരിക്കുക. തിരുവനന്തപുരം ഒബ്സര്വേറ്ററിയില് സര്ക്കാര് ജീവനക്കാര്ക്കായുള്ള പുതിയ ബഹുനില ക്വാര്ട്ടേഴ്സുകളുടെ നിര്മാണോദ്ഘാടനം നിര്വഹിക്കുകയായിരുന്നു അദ്ദേഹം. ഗവണ്മെന്റ് ക്വാര്ട്ടേഴ്സുകളുടെ ലഭ്യതയുടെ മൂന്നിരട്ടിയോളമാണ് ആവശ്യക്കാര്. വലിയൊരു വിഭാഗം ജീവനക്കാര് ഏറെദൂരം യാത്ര ചെയ്താണ് ജോലി ചെയ്യുന്നത്. ഈ ജീവനക്കാരില് ഭൂരിപക്ഷവും വനിതകളാണ്. ജീവനക്കാരില് മുപ്പത് ശതമാനത്തോളം പേര്ക്കെങ്കിലും ക്വാര്ട്ടേഴ്സുകളുടെ പ്രയോജനം ലഭിക്കത്തക്കവിധമാണ് പദ്ധതികള് ആവിഷ്കരിക്കേണ്ടതെന്നും മന്ത്രി പറഞ്ഞു.
ഒബ്സര്വേറ്ററി കോമ്പൗണ്ടിലുള്ള റിക്രിയേഷന് ക്ളബ്ബ് ഹാളില് നടന്ന ചടങ്ങില് വി.എസ്. ശിവകുമാര് എംഎല്എ അധ്യക്ഷത വഹിച്ചു. മേയര് വി.കെ. പ്രശാന്ത് മുഖ്യപ്രഭാഷണം നടത്തി. കൗണ്സിലര് ഐഷ ബേക്കര്, ചീഫ് ആര്ക്കിടെക്റ്റ് രാജീവ് പി.എസ്, ഒബ്സര്വേറ്ററി ഗവണ്മെന്റ് ക്വാര്ട്ടേഴ്സ് അസോസ്സിയേഷന് പ്രസിഡന്റ് കെ.മനോജ് തുടങ്ങിയവര് പങ്കെടുത്തു. ദക്ഷിണമേഖല കെട്ടിടവിഭാഗം സൂപ്രണ്ടിങ് എന്ജിനീയര് ഡി. ഹരിലാല് റിപ്പോര്ട്ട് അവതരിപ്പിച്ചു. കെട്ടിടവിഭാഗം ചീഫ് എന്ജിനീയര് ഇ.കെ. ഹൈദ്രു സ്വാഗതവും സ്പെഷ്യല് ബില്ഡിങ്സ് ഡിവിഷന് എക്സിക്യൂട്ടീവ് എന്ജിനീയര് ജ്യോതി. ആര് നന്ദിയും പറഞ്ഞു.
തലസ്ഥാനനഗരമായ തിരുവനന്തപുരത്ത് സര്ക്കാര് ജീവനക്കാര്ക്ക് മതിയായ താമസസൗകര്യം ലഭിക്കാത്ത സാഹചര്യത്തിലാണ് 625.40 ലക്ഷം രൂപ ചെലവില് പൊതുമരാമത്ത് വകുപ്പ് ഒബ്സര്വേറ്ററി ഹില്ലില് ക്വാര്ട്ടേഴ്സുകള് പണിയുന്നത്. മൂന്നുനിലകളുള്ള പന്ത്രണ്ട് ക്വാര്ട്ടേഴ്സുകളാണ് രണ്ടു ബ്ളോക്കുകളിലായി പണിയുന്നത്.
Discussion about this post