കൊച്ചി: പ്രളയദുരന്ത നിവാരണ പ്രവര്ത്തനങ്ങളില് കുടുംബശ്രീയുടെ സേവനങ്ങള് അഭിനന്ദനാര്ഹമാണെന്ന് ഐക്യരാഷ്ട്രസഭയുടെ പരിസ്ഥിതി പ്രോഗ്രാമിലെ ദുരന്ത അപകട സാധ്യതാ ലഘൂകരണ വിഭാഗത്തിന്റെ തലവന് ഡോ മുരളീ തുമ്മാരുകുടി പറഞ്ഞു. എറണാകുളം കുടുംബശ്രീ ജില്ലാമിഷന്റെ ആഭിമുഖ്യത്തില് കുടുംബശ്രീ വനിതകള്ക്കായി നടത്തിയ പരിപാടിയില് സംസാരിക്കുകയായിരുന്നു അദ്ദേഹം. എറണാകുളം കുടുംബശ്രീയുടെ 101 ചെയര്പേഴ്സണ്മാരും വൈസ് ചെയര്പേഴ്സണ്മാരും കുടുംബശ്രീ ഉദ്യോഗസ്ഥരും പങ്കെടുത്തു.
ദുരന്തം എല്ലായ്പ്പോഴും സമൂഹത്തിന്റെ താഴെത്തട്ടുകാരെയാണ് കൂടുതല് ബാധിക്കുന്നത്. പുനര്നിര്മ്മാണമെന്നത് അര്ത്ഥമാക്കുന്നത് ദുരന്തങ്ങള് ഒരിക്കലും ബാധിക്കാത്ത കേരളം എന്ന രീതിയില് കൂടി ആകണമെന്നും നേതൃത്വഗുണമുള്ള കുടുംബശ്രീ സ്ത്രീകള് ഈ പ്രവര്ത്തനങ്ങളില് പങ്കാളികളാകണമെന്നും അദ്ദേഹം പറഞ്ഞു. കേരളത്തിന്റെ സമസ്ത തൊഴില് മേഖലകളിലും തങ്ങളുടെ പ്രാതിനിധ്യം അറിയിച്ച കുടുംബശ്രീ അംഗങ്ങള് തൊഴിലിടങ്ങളില് തങ്ങള്ക്കു മികച്ച സുരക്ഷാസംസ്ക്കാരം ഉറപ്പാക്കുന്നതില് കൂടി ശ്രദ്ധ കേന്ദ്രീകരിക്കണമെന്നു അദ്ദേഹം അഭിപ്രായപ്പെട്ടു. വിനോദസഞ്ചാരം പോലെയുള്ള മേഖലകളില് കുടുംബശ്രീ വനിതകളുടെ പങ്കാളിത്തം കൂടുതല് ഉറപ്പാക്കണമെന്നും മികച്ച വരുമാനം ലഭിക്കുന്ന ജോലികളിലേക്കും തങ്ങളുടെ തൊഴില്സംസ്കാരം വ്യാപിപ്പിക്കണമെന്നും അദ്ദേഹം പറഞ്ഞു. മാറി വരുന്ന കാലഘട്ടത്തിനു അനുസൃതമായി പുതുതലമുറയുടെ തൊഴില് നൈപുണ്യം കൂടി ഉള്പ്പെടുത്തി കുടുംബശ്രീ സ്വയം അപ്ഡേറ്റ് ചെയ്യേണ്ടതുണ്ടെന്നും അദ്ദേഹം പറഞ്ഞു.
കുടുംബശ്രീ ഗവേണിങ് ബോഡി അംഗം ശാരദ മോഹന്, കുടുംബശ്രീ ജില്ലാമിഷന് അസിസ്റ്റന്റ് കോര്ഡിനേറ്റര്മാരായ രഞ്ജിനി എസ്, റജീന റ്റി എം , രാഗേഷ് കെ ആര് എന്നിവര് പ്രസംഗിച്ചു .
Discussion about this post