കൊച്ചി: ശബരിമല വിഷയത്തില് സര്ക്കാരിന് ഹൈകോടതിയുടെ രൂക്ഷ വിമര്ശനം. വാദം കേള്ക്കുന്നതിനിടെ, ശബരിമലയില് പൊലീസിന്റെ ഇടപെടല് അമിതമാണെന്നു നിരീക്ഷിച്ച കോടതി ഇത് അനുവദിക്കാനാകില്ലെന്നു പറഞ്ഞു. സുപ്രീം കോടതി ഉത്തരവു പാലിക്കാന് ബാധ്യസ്ഥമാണ്. എന്നാല് വിധിയുടെ പേരില് കുട്ടികള് ഉള്പ്പെടെ തീര്ഥാടനത്തിന് എത്തുന്നവര്ക്കു ബുദ്ധിമുട്ടുണ്ടാക്കരുതെന്നും കോടതി പറഞ്ഞു.
നെയ്യഭിഷേകത്തിന് എത്തുന്ന ഭക്തരെ രാത്രി തിരിച്ചയയ്ക്കരുതെന്നു പറഞ്ഞ ഹൈക്കോടതി ഇക്കാര്യത്തില് ഉറപ്പു നല്കി സത്യവാങ്മൂലം സമര്പ്പിക്കാന് എ.ജിയോട് ആവശ്യപ്പെട്ടു. എന്നാല് ശബരിമലയില് ഏര്പ്പെടുത്തിയിരിക്കുന്ന സമയനിയന്ത്രണത്തെ കോടതി അനുകൂലിച്ചു. ഭക്തര്ക്ക് ശൗചാലയങ്ങളും കൂടിവെള്ളവും ഉറപ്പാക്കണം. യഥാര്ഥ ഭക്തര്ക്കു സുഗമമായി തീര്ഥാടനം നടത്താന് കഴിയണം. യഥാര്ഥ ഭക്തര്ക്കുണ്ടായ ബുദ്ധിമുട്ടുകള് പരിഗണിക്കണം. എന്തുകൊണ്ടാണ് ഭക്തരെ നടപ്പന്തലില് വിശ്രമിക്കാന് അനുവദിക്കാത്തതെന്നും കോടതി ചോദിച്ചു. സന്നിധാനത്ത് വെള്ളം ഒഴുക്കിവിടാന് പൊലീസിന് അധികാരം നല്കിയത് ആരാണെന്നും ഹൈക്കോടതി ചോദിച്ചു.
ശബരിമലയില് ഡ്യൂട്ടിയിലുള്ള പൊലീസ് ഓഫിസര്മാര്ക്കു ജനങ്ങളെ നിയന്ത്രിച്ചു മുന്പരിചയമുണ്ടോയെന്നും കോടതി ചോദിച്ചു. പൊലീസ് ഉദ്യോഗസ്ഥരുടെ വിശദാംശങ്ങള് നല്കാന് സര്ക്കാരിനു നിര്ദേശം നല്കി. ശബരിമലയില് ഇവരുടെ മുന് പരിചയം അറിയിക്കണമെന്നും കോടതി പറഞ്ഞു.
Discussion about this post