തിരുവനന്തപുരം: ഭരണഘടന സംബന്ധിച്ച ബോധത്തിന്റെ കുറവ് രാജ്യത്തെമ്പാടുമുണ്ടെന്നും അത് പരിഹരിക്കാനുള്ള ശ്രമങ്ങള് വ്യാപകമാക്കണമെന്നും സ്പീക്കര് പി. ശ്രീരാമകൃഷ്ണന് അഭിപ്രായപ്പെട്ടു. പൊതുവിദ്യാഭ്യാസ വകുപ്പും സംസ്ഥാന സാക്ഷരതാ മിഷനും സംയുക്തമായി സംഘടിപ്പിച്ച ഭരണഘടനാ സാക്ഷരത- ജനകീയ വിദ്യാഭ്യാസ പരിപാടി ഉദ്ഘാടനം ചെയ്യുകയായിരുന്നു അദ്ദേഹം.
സ്വന്തം രാജ്യത്തിന്റെ രാഷ്ട്രീയ ഉള്ളടക്കത്തെക്കുറിച്ച് ബോധമില്ലാത്ത തലമുറയും ദേശീയഗാനം തെറ്റുകൂടാതെ ആലപിക്കാനറിയാത്ത തലമുറയും രാജ്യത്തിന് അപമാനമാണ്. സാമൂഹ്യ ശാസ്ത്രമെന്നത് വെറും ഭൂമിശാസ്ത്രമല്ല. സമൂഹത്തിന്റെ ഘടനയുടെയും സാമൂഹ്യമായ അസമത്വത്തിന്റെയും പഠനമാണത്. ഭരണഘടനയുടെ മൂല്യങ്ങള് എന്താണെന്ന് നാം അറിയണം. നമ്മെ ഏകോപിപ്പിച്ചു നിര്ത്തുന്നത് നമ്മുടെ ഭരണഘടനയാണെന്നും സ്പീക്കര് പറഞ്ഞു. ഭരണഘടനയുടെ സൂക്ഷ്മമായ പഠനം നാടിന് അനിവാര്യമാണ്. ഭരണഘടന തന്നെയാണ് നാടിന്റെ അടിത്തറയെന്നും ഭരണഘടനാ സാക്ഷരത സാംസ്കാരികമായ പഠനത്തിനായി ഉപയോഗപ്പെടുത്തണമെന്നും സ്പീക്കര് പറഞ്ഞു.
പൊതുവിദ്യാഭ്യാസ വകുപ്പ് മന്ത്രി പ്രൊഫ. സി. രവീന്ദ്രനാഥ് അധ്യക്ഷത വഹിച്ചു. സാക്ഷരതാ മിഷന് ഡയറക്ടര് ഡോ. പി.എസ്. ശ്രീകല സ്വാഗതം പറഞ്ഞു. പുരുഷന് കടലുണ്ടി എംഎല്എ, നുവാല്സ് മുന് വൈസ് ചാന്സലര് ഡോ. എന്. കെ. ജയകുമാര്, നവകേരളം കര്മപദ്ധതി കോ ഓര്ഡിനേറ്റര് ചെറിയാന് ഫിലിപ്പ്, നിയമസഭാ സെക്രട്ടറി വി.കെ. ബാബുപ്രകാശ് തുടങ്ങിയവര് സംബന്ധിച്ചു.
Discussion about this post