തിരുവനന്തപുരം: കൈത്തറി മേഖലയെ പുനരുജ്ജീവിപ്പിക്കാനും തൊഴിലാളികളുടെ തൊഴില് ഉറപ്പാക്കാനും സര്ക്കാര് പ്രതിജ്ഞാബദ്ധമാണെന്ന് വ്യവസായ, വാണിജ്യ വകുപ്പ് മന്ത്രി ഇ.പി. ജയരാജന് പറഞ്ഞു. ഹാന്റക്സിന്റെ പുതിയ ഉത്പന്നമായ പ്രീമിയം റോയല് ഡബിള് ധോത്തി വിപണിയിലിറക്കുന്നതിന്റെ ഭാഗമായി നടത്തിയ വാര്ത്താ സമ്മേളനത്തില് സംസാരിക്കുകയായിരുന്നു അദ്ദേഹം.
കേരളം കൈത്തറിയുടെ നാടാണെന്നും ലോക വിപണിയില്ത്തന്നെ കേരള കൈത്തറിക്ക് പ്രിയമേറെയാണെന്നും അദ്ദേഹം പറഞ്ഞു. ആരോഗ്യദായകവും അന്തരീക്ഷത്തിനിണങ്ങുന്നതും രോഗപ്രതിരോധ ശേഷിയുള്ളതുമാണ് കൈത്തറി ഉത്പന്നങ്ങള്. യന്ത്രവത്കൃത കൈത്തറിയുടെ 25 ശതമാനത്തോളം മാത്രം ഉത്പന്നങ്ങളേ പരമ്പരാഗത കൈത്തറിയില് ഉത്പാദിപ്പിക്കുന്നുള്ളൂ. നെയ്ത്തുതൊഴിലാളികള്ക്ക് വളരെ കുറഞ്ഞ കൂലിയാണ് ലഭിക്കുന്നത്. കൈത്തറി ഉത്പാദനം വര്ധിപ്പിക്കുകയും കൈത്തറി മേഖലയെ സജീവമായി നിലനിര്ത്തുകയുമാണ് സര്ക്കാരിന്റെ ലക്ഷ്യം. പുതിയ ഉത്പന്നങ്ങള് വിപണിയിലെത്തിക്കുന്നത് ഇതിന്റെ ഭാഗമാണ്. ദക്ഷിണേന്ത്യന് സംസ്ഥാനങ്ങളില് കൈത്തറി വ്യാപനം ശക്തിപ്പെടുത്തുമെന്നും വാണിജ്യ മിഷന് രൂപീകരിച്ച് വിദേശ മാര്ക്കറ്റില് കൈത്തറിക്ക് വിപണിയുണ്ടാക്കുമെന്നും മന്ത്രി പറഞ്ഞു.
ഉണക്ക് പാവ് ഉപയോഗിച്ച് കുഴിത്തറികളില് വിദഗ്ധരായ നെയ്ത്തുകാര് നെയ്തെടുക്കുന്ന വേഷ്ടികളും ധോത്തികളുമാണ് ഹാന്റെക്സ് പുതിയതായി വിപണിയിലെത്തിക്കുന്നത്. നൂറു മീറ്റര് നീളത്തില് പാവ് തയ്യാറാക്കി അത് തെരുവില് നിവര്ത്തിക്കെട്ടി പ്രത്യേകതരം പുല്ലില് നിര്മിച്ച ബ്രഷ് ഉപയോഗിച്ച് ആറോളം തൊഴിലാളികള് ചേര്ന്ന് കൈകൊണ്ട് പശ പിടിപ്പിച്ച് നൂലിനെ ബലപ്പെടുത്തുന്ന രീതിയാണ് ഉണക്ക് പാവ് നിര്മാണം. പുലര്ച്ചെയുള്ള അന്തരീക്ഷത്തിലാണ് ഇത് ചെയ്യുന്നത്.
പ്രകൃതിദത്തമായ അരിപ്പശ, ചൗവ്വരി, വെളിച്ചെണ്ണ തുടങ്ങിയ ഉത്പന്നങ്ങളാണ് പശപിടിപ്പിക്കാനായി ഉപയോഗിക്കുന്നത്. യാതൊരു രാസപദാര്ത്ഥങ്ങളും ഉപയോഗിക്കുന്നില്ല. നൂലില് രാസപദാര്ത്ഥങ്ങള് ഉപയോഗിക്കാത്തതിനാല് ആരോഗ്യ പ്രശ്നങ്ങളും പരിസ്ഥിതി മലിനീകരണവും ഉണ്ടാകുന്നില്ല.
തനതായ കൈത്തറി ഉത്പന്നമായ ബാലരാമപുരം വേഷ്ടിയും ധോത്തിയും കൂടുതല് ജനങ്ങളിലെത്തിക്കുന്നതിന്റെ ഉത്തരവാദിത്വം ഹാന്റെക്സ് ഏറ്റെടുത്തിരിക്കുകയാണ്. ഇതിനായി കൈത്തറി സംഘങ്ങളെ ബോധവത്കരിക്കുകയും കൂടുതല് വേതനവും തൊഴിലും ഉറപ്പാക്കാന് നടപടി സ്വീകരിച്ചിട്ടുണ്ട്. പ്രതിമാസം 1500 വേഷ്ടികളെങ്കിലും മാര്ക്കറ്റിലെത്തിക്കാനാകുമെന്നും ഉത്പാദനം കൂട്ടാന് നടപടി സ്വീകരിച്ചു വരികയാണെന്നും അദ്ദേഹം അറിയിച്ചു. തുടക്കത്തില് ഹാന്റെക്സിന്റെ മേജര് ഷോറൂമുകളിലൂടെ വിപണിയിലെത്തിക്കുന്ന ഡബിള് ധോത്തിയുടെ ശരാശരി വില 1120 രൂപയാണ്.
Discussion about this post