പത്തനംതിട്ട: ശബരിമല മണ്ഡലമകരവിളക്ക് മഹോത്സവത്തോട് അനുബന്ധിച്ച് കര്ശന നിരീക്ഷണവുമായി എക്സൈസ് വകുപ്പ്. വ്യാജമദ്യഒഴുക്ക് തടയുന്നതിനും തീര്ത്ഥാടകരെ ബോധവത്ക്കരിക്കുന്നതിനുമുള്ള പ്രവര്ത്തനങ്ങളാണ് എക്സൈസ് വകുപ്പ് നടത്തുന്നത്. സന്നിധാനം, പമ്പ, നിലയ്ക്കല് എന്നീ മൂന്ന് സ്ഥലങ്ങളില് താത്കാലിക റേഞ്ച് ഓഫീസുകള് പ്രവര്ത്തനം ആരംഭിച്ച് കഴിഞ്ഞു. എക്സൈസ് സര്ക്കിള് ഇന്സ്പെക്ടര്മാര്ക്കാണ് ഇതിന്റെ പ്രവര്ത്തനചുമതല. ഈ മൂന്ന് ഓഫീസുകളുടെ പ്രവര്ത്തനങ്ങള് ഏകോപിപ്പിക്കുന്നതിന് പമ്പയില് ഇരുപത്തിനാല് മണിക്കൂറും പ്രവര്ത്തിക്കുന്ന അസി.എക്സൈസ് കമ്മിഷണറുടെ ഓഫീസ് കേന്ദ്രീകരിച്ച് കണ്ട്രോള് റൂം പ്രവര്ത്തനം ആരംഭിച്ചു.
ഡെപ്യൂട്ടി എക്സൈസ് കമ്മീഷണര് ഓഫീസുകളുടെ പ്രവര്ത്തനം വിലയിരുത്തി നിര്ദ്ദേശങ്ങള് നല്കും. നിലയ്ക്കലില് പ്രവര്ത്തിക്കുന്ന ഓഫീസില് നാല് വനിതാ എക്സൈസ് ഗാര്ഡുമാരെ ഡ്യൂട്ടിക്ക് നിയോഗിച്ചിട്ടുണ്ട്. വിമുക്തിയുമായി ചേര്ന്ന് തീര്ത്ഥാടകരെ ബോധവത്ക്കരിക്കുന്നതിനായി നോട്ടീസ് വിതരണവും നടത്തി വരുന്നു.
രാജാപ്പാറ മുതല് മദ്യനിരോധനമേഖലയായി പ്രഖ്യാപിച്ച് പ്രത്യേകം ബോര്ഡുകള് എല്ലാ ഭാഷയിലുമായി സ്ഥാപിച്ചിട്ടുണ്ട്. റാന്നി, പമ്പ, നിലയ്ക്കല്, അട്ടത്തോട്, സന്നിധാനം എന്നിവിടങ്ങളിലെ വനമേഖലയിലും മറ്റ് സ്ഥലങ്ങളിലും ഉത്സവത്തിന് മുന്നോടിയായി സംയുക്ത റെയ്ഡുകള് നടത്തിയിരുന്നു. ഉത്സവത്തോട് അനുബന്ധിച്ച് മണ്ണാറക്കുളഞ്ഞി മുതല് പ്ലാപ്പള്ളി വരെയുള്ള റോഡില് 24 മണിക്കൂറും എക്സൈസ് ഇന്സ്പെക്ടറുടെ നേതൃത്വത്തില് റോഡ് പട്രോളിംഗും നടപ്പാക്കി. തുടര്ന്നുള്ള വാഹനപരിശോധന താല്ക്കാലിക റേഞ്ചിലെ ഉദ്യോഗസ്ഥര് നിര്വഹിച്ച് വരുന്നു.
Discussion about this post